Madwar 7,000 sebat elef persuna żżur il-Klinika tal-Ġinekoloġija fis-sena. It-tabiba Valeska Padovese, f’intervista mal-Gazzetta KullĦadd, qalet li hawn żieda ta’ ċirkolazzjoni ta’ mard infettiv f’Malta, u kompliet tispjega li l-moviment tan-nies minn pajjiżi differenti seta’ wassal għal din iż-żieda.
It-tabiba Padovese qalet li bħalissa l-klinika għaddejja b’riċerka flimkien mal-Organizazzjoni Dinjija għas-Saħħa biex jiġi żviluppat test effettiv li permezz tiegħu, jingħata riżultat fi 30 minuta.
Dan it-test iwassal biex il-kura tibda tingħata fl-immedjat f’każ ta’ riżultat pożittiv. Fil-preżent, f’każ li t-test jirriżulta pożittiv, il-persuna tintalab tmur il-klinika fejn isir it-tieni test biex tiġi kkonfermata l-aħbar. Il-persuna tkun riferuta għand speċjalisti tal-psikoloġija u tibda t-trattament minn hemm.
Hija qalet ukoll li hawn perċezzjoni inkoretta li l-maġġoranza tal-klijenti tal-klinika huma persuni omosesswali. L-istatistika turi li 25% ta’ dawk li jirrikorru għal dawn is-servizzi huma persuni omosesswali.
Il-klinika timxi ma’ prassi ta’ kunfidenzjalità, fejn kull persuna tkun irreġistrata mal-klinika b’numru uniku u mhux irreġistrat b’dettalji personali. Kull numru jinżamm fir-rekords tal-klinika u kull test isir b’mod anonimu.
Il-klinika tilqa’ wkoll adoloxxenti li għandhom id-dritt għas-servizzi mingħajr superviżjoni adulta. FL-2018, 3.8% tal-persuni kienu adoloxxenti.
Skont statistika jirriżulta li tfajliet li jkollhom x’jaqsmu sesswalment fl-età ta’ 15-il sena huma erba’ darbiet iżjed fiċ-ċans li jirrapportaw infezzjonijiet.
