Sal-aħħar ta’ din is-sena, il-pubbliku mistenni jibda jgawdi mill-ġnien formali fil-Park Nazzjonali ta’ Ta’ Qali.
Din iż-żona tal-Park Nazzjonali għaddejja b’xogħlijiet estensivi biex tittrasforma dan il-ġnien u jkun jista’ jitgawda fil-glorja kollha tiegħu.
Ix-xogħlijiet kienu jinkludu l-bini ta’ sistema ta’ irrigazzjoni, pavimentar mill-ġdid, restawr tal-funtana u wara l-kwinti tal-amfiteatru u sistema ta’ dawl intelliġenti fost oħrajn.
Il-Perit Nadia Gatt Curmi qalet, “Ix-xogħol hawnhekk ilu li telaq minn Marzu ta’ din is-sena. Mistenni li l-ewwel fażi tiegħu titlesta sal-aħħar ta’ din is-sena, f’Diċembru tal-elfejn, wieħed u għoxrin. Nistgħu ngħidu li nqala’ dak kollu li kien hawn eżistenti fil-park. Inqalgħet iċ-ċangatura li kien hawn, inqalgħu s-servizzi kollha, it-toilets kollha u hawn rijabilitazzjoni sħiħa għaddejja.”
Meta żar ix-xogħlijiet, il-Ministru għall-Infrastruttura Ian Borg qal li dan il-ġnien saħansitra ġie estiż hekk kif tneħħew numru ta’ binjiet fosthom legali u oħrajn illegali fuq wara tal-amfiteatru.
Spjega, “Għandek fażijiet oħra f’Ta’ Qali fejn in-nies lanqas setgħet tersaq lejhom bħal pereżempju ż-żona tal-kunċerti, li qed insejħulha żona tal-kunċerti imma fil-verità il-maġġorparti assoluta tal-ġranet matul is-sena meta mhux se jkun hemm kunċerti jew festivals ta’ din ix-xorta, ħa jkun spazju fejn in-nies imorru fil-ħdura jgawdu l-ħin liberu tagħhom. Filfatt dak l-ispazju biss huwa daqs 6 grawnds tal-futbol illi huwa totalment ġdid.”
Il-Kordinatur tal-proġett, Jason Micallef spjega li dan il-ġnien ġie disinjat b’tali mod li jkun spazju ta’ rikreazzjoni fejn ukoll ser ikunu jistgħu jittellgħu attivitajiet kulturali.
Qal, “Dan mhux biss kien bżonn imma l-mod kif ġie ridiżinjat se jkun qiegħed jilqa’ ħafna iktar għal attivitajiet kulturali u attivitajiet ta’ divertiment imma wkoll li jilqak ħafna iktar bħala ċentru ta’ rikreazzjoni għall-familja kollha u konvint ħafna, pożittiv ħafna li lejn l-aħħar ta’ din is-sena nrodduh lura lill-familji Maltin u Għawdxin kollha.”
