Għall-ewwel darba l-fergħa taż-żgħażagħ Nazzjonalisti – Moviment Żgħażagħ Partit Nazzjonalista – se jkollha żewġ rappreżentanti għal Għawdex, minflok wieħed.
Dan hu riżultat tal-ġlied intern kbir li qed jiddomina llum il-ġurnata fil-Partit inġenerali, mhux l-inqas f’Għawdex.
Irrappurtat dwar dan il-gazzetta KullĦadd, il-Ħadd filgħodu hekk kif spjegat li frott il-kilba biex iżommu l-kontrolli f’kull livell fil-Partit, iż-żewġ Deputati Chris Said u Alex Borg din il-ġimgħa kienu impenjati jaraw li r-rappreżentanza Għawdxija fl-MŻPN tkun tagħhom.
Dan frott anke deċiżjoni wara “logħob tat-tfal” bejn iż-żewġ deputati Għawdxin biex b’hekk issa ċerti Thomas Mizzi u Kevin Curmi se jkunu r-rappreżentanti mhux uffiċjali ta’ Borg u Said rispettivament.
Mizzi huwa meqjus l-id il-leminija tad-Deputat Alex Borg filwaqt li Curmi jiġi n-neputi ta’ Chris Said.
F’post fuq Facebook nhar il-Ħamis, Alex Borg iddikjara t-tmiem tiegħu fil-fergħa Nazzjonalista u kif kien ta’ unur u privileġġ għalih li jservi fir-rwol bħala rappreżentant għal Għawdex fl-aħħar sena u nofs
Intant imkejjen fil-Partit Nazzjonalista sostnew kif id-Deputat tal-Establishment Chris Said kellu diffikultà kbira biex isib żagħżugħ li jidħollu fil-kumitat tal-MŻPN sakemm eventwalment waqa’ għal Kevin, li jiġi t-tifel ta’ Pat Attard, oħt Linda, il-mara tiegħu.
Din mhix l-ewwel darba li Said ipprova jinfiltra qraba tiegħu f’pożizzjonijiet strateġiċi biex iżomm il-qawwa li l-familja Said, magħrufa bħala “Tal-Ganga”, għandha f’Għawdex.
Hawn il-Kullħadd fakkret kif kienet hi li żvelat kif wara l-elezzjoni ġenerali u wara d-deċiżjoni tal-Kap Nazzjonalista Bernard Grech li ma jagħti l-ebda rwol fix-Shadow Cabinet lil Chris Said, bl-iskuża li kien parti mill-Kabinett ta’ Lawrence Gonzi qabel l-2013, Said ippropona lit-tmexxija Nazzjonalista li kien lest iċedi s-siġġu Parlamentari tiegħu b’kundizzjoni waħda, dik li postu jingħata direttament lil ħuh iżgħar minnu Edward, li llum hu s-Sindku tan-Nadur.
Said u Borg qed ikomplu fejn ħallew fil-kampanja tal-elezzjoni ġenerali fejn sorsi fil-Partit Nazzjonalista kienu qalu kif l-establishment li i jappoġġja lil Said, beda jipprova jiskredita liż-żagħżugħ Borg, li kien jidher ovvju li se jkun ta’ theddida għaċ-ċansijiet tal-Eks Ministru min-Nadur.
Saret ukoll pressjoni fuq it-tmexxija tal-Partit biex kemm jista’ jkun dan jidher mill-inqas bħala rappreżentant Nazzjonalista fuq il-midja u f’konferenzi stampa uffiċjali.
Min-naħa tiegħu, Borg, li kellu kull sostenn mill-Eks Ministru Giovanna Debono warajh, sfida saħanistra lill-organizzazzjonijiet Repubblika u Civil Society Network u akkużahom li qed jagħmlu biss ħsara lill-PN, xi ħaġa li ġabet reazzjoni u akkużi ta’ tattiċi Faxxisti.
