- DANIEL MICALLEF JITKELLEM DWAR L-GĦANIJIET TAL-KONFERENZA ĠENERALI
- SPAZJU GĦAD-DELEGATI TAL-PARTIT LABURISTA U GĦAS-SOĊJETÀ
Għal Daniel Micallef, il-President tal-Partit Laburista, il-ġimgħa li tibda għada hija fost l-iktar impenjattivi. Il-Partit Laburista jibda jlaqqa’ l-ogħla organu tiegħu, il-konferenza ġenerali, u l-programm għall-jiem li ġejjin huwa wieħed ambizzjuż.
Bit-tema “Malta ’l quddiem għal iktar suċċess” din il-konferenza ġenerali se tkun waħda ta’ partit li għandu l-grinta li jkompli jġib il-bidliet f’dan il-pajjiż. F’kummenti mal-gazzetta KullĦadd Micallef jagħmilha ċara li d-diskussjoni mhix waħda li tħares lura.
“Il-mozzjoni li għandna quddiemna tirrikonoxxi s-suċċess li ġab il-Gvern. Ma ninsewx li s-suċċess tal-Gvern huwa bbażat fuq il-Manifest Elettorali li kien approvat mill-istess konferenza fl-2013.
Tiffoka wkoll fuq il-bidliet li kellna f’dawn l-erba’ snin. Però iktar minn hekk, inħarsu lejn l-aħħar erba’ snin bħala l-pedament għal li ġej. Pedament mil-lat ekonomiku, finanzjarju u soċjali fejn fadal affarijiet xi jsiru. Wieħed issa jista’ jħares ’il quddiem biex Malta tagħmel iktar suċċess,” qal Micallef.
Dan qed isir f’mument fejn il-Partit Laburista diġà beda jaħseb u jħabbat l-ideat dwar il-manifest elettorali għall-elezzjoni ġenerali li jmiss. Manifest li jista’ jkun wieħed b’saħħtu iktar minn dak għall-elezzjoni li għaddiet.
“Il-Partit Laburista fil-gvern irranġa diversi setturi. Qegħidhom f’posthom u dawwar ir-rotta. Issa l-pajjiż jista’ jibni programm iktar b’saħħtu. Nistgħu nippjanaw affarijiet li permezz tagħhom inkunu iktar ambizzjużi,” qal Micallef li fisser kif il-konsultazzjoni mal-imsieħba soċjali hi kontinwa.
“Huwa proċess kontinwu u li qed jgħaġġel iktar meta dħalna fir-raba’ sena tal-leġiżlatura. Jekk il-manifest elettorali kien intqal li huwa Alice in Wonderland jew gimmick tal-millennju, il-manifest se jaqla’ iktar aġġettivi kkuluriti għax fih se noħolmu iktar. Imma kif għamilna din l-aħħar darba se nuru li dan huwa ħolm fattibbli,” qal il-President tal-Partit Laburista li fi kliemu jirrenja s-sens ta’ ottimiżmu.
Realiżmu wkoll
Is-sens ta’ ottimiżmu ma jfissirx li hu jew il-Partit Laburista mhumiex konxji tal-isfidi li jeżistu. Tant li tema ewlenija fil-ġimgħa tal-konferenza se tkun l-isfida tal-kera. Micallef jispjega għaliex: “Kellna għażla. Stajna għażilna settur fejn m’hemmx sfidi jew fejn ksiba suċċessi biss. Però ridna tema li għandha impatt soċjali u li fiha x’tiddiskuti anke jekk diffiċli. Huwa qasam fejn il-Gvern diġà għamel, billi rdoppja s-sussidju tal-krijiet, iżda m’hemmx fejn isir iktar. Kellna diskussjoni interna dwar din. Kien hemm min qal ‘din mhix kwistjoni antikaptika.’ Iva, imma rridu naħdmu biex nindirizzawha.”
Micallef qal li se jkun mistieden min għandu x’jaqsam mas-settur. “Dawk li jgħixu fil-kera. Din mhix biss ir-realtà tal-housing soċjali imma s-settur tal-kera fl-iktar sens wiesa’ tiegħu. Fejn għandek nies li mhumiex qegħdin fil-faqar jew ma jaħdmux. Hemm min għandu paga tajba u l-kirja ra tiżdied minn €500 fix-xahar għal €800 fix-xahar. Għandna suq li ssaħħaħ ħafna kawża ta’ ekonomija li qed tikber. Mhix xi ħaġa negattiva fiha nfisha imma huwa suċċess li ħalla vittmi wkoll u dawk ir-realtajiet iridu jkunu indirizzati. Hija sfida li forsi tajjeb li jkollna. Għax il-problema li jkollok proprjetà fuq is-suq u ħadd ma jrid jikriha iktar kerha,” żied Micallef.
Tenna li l-Partit Laburista se jħares lejn l-aspett minn diversi aspetti, għalkemm fi kliemu: “Dawk vulnerabbli jieħdu prijorità.”
Is-sehem tal-pubbliku jfisser li se tkun konferenza ġenerali fejn il-Partit Laburista jaġixxi ta’ wieħed miftuħ. Partit li mhux magħluq fih innifsu. Hawn dlonk il-mistoqsija. Se terġa’ tkun konferenza ta’ moviment u ta’ partit li qed jilqa’ nies ġodda?
Tweġiba skjetta minn Daniel Micallef: “Wieħed m’għandux għalfejn jistenna l-konferenza biex jara li dan il-momentum inżamm. Il-Prim Ministru għamel appell li l-bibien tal-Partit Laburista huma miftuħin beraħ. Hemm persuni li jafuhom in-nies u għalhekk meta jagħmlu ħsibijiet pubbliċi jkunu nnotati imma hemm ħafna nies li b’mod silenzjuż qed jagħżlu lill-Partit Laburista. Dan nattribwih għal minn fejn telaq il-PL u fejn qiegħed illum. Qabel l-elezzjoni li għaddiet, il-Partit Laburista kien iffaċċjat b’diversi akkużi bħal li jiġġammja l-ekonomija u jżid il-qgħad u kellek nies li jgħidulek kif qegħdin nafu u kif se nkunu ma nafux. Illum jafu kif qegħdin taħt gvern ġdid u dak jikkonviniċihom jagħmlu l-pass.”
Iżda, il-moviment huwa possibbli wkoll grazzi għal dawk li huma attivisti kbar tal-Partit Laburista. Staqsejt x’inhu l-animu fost id-delegati tal-Partit Laburista.
“Id-delegati tal-Partit Laburista jien ikolli rapporti regolari magħhom u ftit ilu kellna l-laqgħat ġenerali tal-lokalitajiet. Il-ħsus ġenerali huma li dan il-Gvern qed jagħmel ġid kbir lill-pajjiż. Il-messaġġ li nieħu hu li għandna biex inkunu kburin. Għax dak li qabel konna nitkellmu u noħolmu dwaru u nimbottaw biex isir u qatt ma sar, illum huwa realtà. Il-konferenza ġenerali u l-attivisti tal-partit għandhom mertu għal dawk il-miżuri li ddaħlu,” qal Micallef li semma lista’ twila ta’ miżuri u inizjattivi li ħa l-Gvern.
Realtà ta’ partit fil-Gvern
Iżda, kemm kien diffiċli li l-Partit Laburista jadatta għall-Gvern.
“Meta partit ikun ilu 25 sena fl-oppożizzjoni ikun qed jaħseb bħala oppożizzjoni. Hija realtà ġdida. Jien qatt ma kont naf il-Partit Laburista fil-gvern għax fis-96 kelli 10 snin. Illum hemm Gvern li int taf,” irrakkonta Micallef.
“It-tranżizzjoni mill-oppożizzjoni tal-Gvern tieħu ftit żmien. Però nenfasizza li trid titgħallem li l-Partit Laburista m’għadux fl-oppożizzjoni, iżda ma tidrax il-Gvern. Din nisħaq fuqha. Huwa perikoluż li tidra l-Gvern u taħseb li qiegħed hemm għal dejjem. Huwa perjodu ta’ fiduċja misluf min-nies u dik trid taħdem għaliha kuljum u kull ma rridu nħarsu lejn l-oppożizzjoni li tant kienet drat il-Gvern li għadha taħseb li għadha fil-Gvern. U dan joħroġ ċar bil-mod kif taġixxi l-oppożizzjoni, negattiva u trid takkuża fuq kollox,” qal Micallef.
Din se tkun ukoll il-konferenza li tagħlaq darba għal dejjem il-kwistjoni dwar ir-reġistrazzjoni tal-Partit Laburista mal-Kummissjoni Elettorali. Il-kelma kwistjoni joġġezzjona għaliha.
“M’hemm ebda kwistjoni. Il-kwistjoni ħoloqha l-Partit Nazzjonalista għax ried kwistjoni meta nqabad li qed jieħu l-flus mhux dikjarati mingħand ħaddieħor. Aħna ktibna lill-Kummissjoni Elettorali u għednielha li dak li kien hemm pendenti b’rabta mal-istatut konna se nindirizzawh f’din il-konferenza ġenerali annwali, għax dak kien imiss. Ma kellniex risposta lura li ma stajniex nagħmlu dan jew li kellna nagħmlu dan qabel. L-emendi meħtieġa diġà kienu diskussi u issa t-Tlieta jkunu approvati f’sessjoni plenarja. Però assolutament kienet bużżieqa tal-Partit Nazzjonalista.
Aħna morna nirreġistraw immedjatament kif daħlet il-liġi, qabel il-Partit Nazzjonalista. Issa ħaddieħor irid jgħid li l-Partit Laburista ma jeżistix. Forsi dik hi x-xewqa tiegħu. Imma mhux ir-realtà,” tenna l-President tal-Partit Laburista li fakkar kif il-Partit Laburista jippubblika l-kontijiet tiegħu. “Nirreferih għad-dibattitu dwar il-finanzjament u jekk ma jifhimx nirreferih għall-Partit Nazzjonalista li nqabad b’sistema li ssejħet skandlu Pagi PN.”
“Le ma nifhimhiex. Qabel l-2013 qatt ma smajna li l-PN kellu diffikultajiet finanzjarji. Mill-għada tal-elezzjoni qamet din il-kwistjoni u jissemmew ċifri ta’ miljuni kbar.
Wieħed jistaqsi kif din il-problema feġġet l-għada tal-elezzjoni ġenerali. Kien hemm xi vit li ngħalaq minn xi mkien? Rajna ħaddiema ma jitħallsux. Rajna ħaddiema jitkeċċew. Naħseb li l-mod kif jaħdem il-PN jirrifletti kif kien imexxi l-Gvern. Għaqal ta’ xejn u nuqqas ta’ trasparenza,” temm jgħid Micallef filwaqt li kompla jħejji għal waħda mill-iktar ġimgħat impenjattivi u importanti għall-Partit Laburista.
