Il-kumpanija Russa Gazprom, li hija kkontrollata mill-Istat Russu, ħabbret li minn nhar l-Erbgħa se tnaqqas tlieta u tletin miljun metru kubu kuljum mill-provvista ta’ gass mill-pipeline Nord Stream – l-akbar pipeline li jwassal il-gass mir-Russja lejn l-Ewropa.
Fi stqarrija, il-kumpanija Russa qalet li se tagħmel dan minħabba ħsarat tekniċi fis-sistema. Il-Gazprom se tkun qed tnaqqas madwar għoxrin fil-mija tal-kapaċità tal-katusa tal-gass.
Il-Ġermanja, b’reazzjoni għal dan l-aħħar żvilupp, qalet li ma tara l-ebda raġuni teknika għal dan it-tnaqqis fil-provvista tal-gass mir-Russja.
Intant, l-Istati membri tal-Unjoni Ewropea qed jippruvaw jiftiehmu bejniethom biex jinnegozjaw il-pjan Ewropew sabiex jitnaqqas l-użu tal-gass għall-ġenerazzjoni tal-enerġija.
Dan wara li l-ġimgħa l-oħra, il-Kummissjoni Ewropea pproponiet li l-Istati membri tal-Unjoni Ewropea għandhom inaqqsu ħmistax fil-mija tal-konsum tal-gass minn Awwissu sa Marzu li ġej.
Dan qed isir bħala pjan ta’ emerġenza għall-provvista tal-enerġija madwar l-Unjoni Ewropea, hekk kif hemm il-biża’ li fix-xitwa, fl-aktar żmien li jkun hemm domanda għall-enerġija, ma jkunx hemm provvista biżżejjed ta’ dawl.
B’din il-proposta l-Kummissjoni Ewropea qalet li l-mira ta’ ħmistax fil-mija hija waħda volontarja, iżda ntqal ukoll kif din il-proposta tista’ tiddaħħal b’mod obbligatorju f’każ li l-Unjoni Ewropea ma jkollhiex provvista biżżejjed ta’ gass ġej mill-kontinent Ewropew.
Dan il-pjan ta’ emerġenza tħabbar mill-Unjoni Ewropea hekk kif il-provvista tal-enerġija lejn il-pajjiżi Ewropej tinsab mhedda wara li l-Gvern Russu qal li se jkompli jnaqqasha, jew saħansitra jwaqqafha.
Dan it-theddid min-naħa tar-Russi qed isir minħabba li l-Unjoni Ewropea imponiet diversi sanzjonijiet fuq Moska, b’reazzjoni għall-invażjoni Russa fl-Ukrajna.
Matul il-jum tat-Tnejn l-ambaxxaturi tal-pajjiżi membri tal-Unjoni Ewropea ltaqgħu sabiex jiddiskutu dan il-pjan tal-Kummissjoni Ewropea, qabel ma t-Tlieta jiltaqa’ l-Kunsill tal-Ministri tal-Enerġija tal-Unjoni Ewropea. Huwa mistenni li f’din il-laqgħa tittieħed deċiżjoni dwar it-triq ’il quddiem fil-qasam tal-enerġija, li bħalissa tinsab fi kriżi.
Diversi ambaxxaturi Ewropej qablu ma’ dan il-pjan, waqt li oħrajn jinsabu inkwetati dwar is-sitwazzjoni fix-xitwa li ġejja, jekk ir-Russja taqta’ l-provvista tal-gass.
Is-sitwazzjoni tant hija ta’ tħassib li l-Gvern Franċiż qed jitlob lil dawk in-negozji li għandhom l-arja kkundizzjonata fil-ħwienet sabiex jagħlqu l-bieb tal-ħanut mal-ġurnata biex jaħlu anqas dawl.
