Il-Kunsill Lokali tal-Furjana se jkun qed jorganizza l-ħdax-il edizzjoni tal-Festival Nazzjonali tal-logħob tan-nar tal-art mekkanizzat fuq il-Fosos tal-Furjana nhar is-Sibt 29 ta’ April.
Il-Kunsill Lokali spjega li l-Festival ta’ din is-sena ser jerġa’ jkun wieħed kompetittiv u b’parteċipazzjoni rekord. Infatti 16 –il Għaqda tan-Nar ser ikunu qed jikkompetu għat-titlu li fl-edizzjoni li għaddiet, intrebaħ mill-Kumpless tan-Nar San Guzepp ta’ Ħaż-Żebbuġ.
L-Għaqdiet tan-nar se jesebixxu l-aqwa żewġ biċċiet ta’ nar tagħhom fuq il-Fosos tal-Furjana fl-10.30pm. B’kollox se jkun hemm 32 struttura ta’ logħob tan-nar mekanizzat. Qabel kull wirja se tkun qed tingħata informazzjoni dwar l-Għaqdiet tan-Nar rispettivi. Il-Logħob tan-Nar ser ikun ukoll akkompanjat minn mużika addattata.
Dan huwa Festival uniku għax ser isir fl-akbar pjazza f’Malta u ser ikun hemm xejn inqas minn 32 struttura piroteknnika f’serata waħda. Ir-rebbieħ tal-Festival ser jiġi magħżul fuq l-aħjar merti fi tliet kategoriji – għall-aħjar mekkaniżmu, għall-aħjar prodotti użati u għall-aktar esebizzjoni oriġinali f’dawk li huma disinn u movimenti.
Kull kategorija jkolla rebbieħ u jingħata trofew filwaqt li r-rebbieħ fost il-kategoriji kollha jiġi ddikjarat bħala r-rebbieħ tal-festival u jingħata trufew u “shield” li tinżamm għal sena.
Il-gurija ser tkun maghmula minn tliet pirotekniċi internazzjonali, filwaqt li c-Chairman ser ikun pirotekniku Malti – s-Sur Michael Brockdorf. Ir-rebbieħa se jitħabbru fl-1 ta’ Mejju f’12.00.
Il-parteċipanti tal-Festival skond l-ordni li ha jesebixxu, huma dawn:
- Kumpless tan-Nar 15 ta’ Awwissu
- Mosta Għaqda tan-Nar Soċjeta Mużikali Maria Bambina
- Banda Vittorja
- Naxxar Għaqda tan-Nar San Gużepp
- Kalkara Għaqda tan-Nar Maria Bambina
- Naxxar Kumpless tan-Nar San Leonardu
- Kirkop Kumpless tan-Nar Santa Katarina
- Żurrieq Għaqda tan-Nar Sagra Familja
- Kalkara Għaqda tan-Nar Madonna tad-Duttrina
- Tarxien Kummissjoni Piroteknika Santa Katarina
- Għaqda Banda Żejtun,
- Żejtun Kumpless tan-Nar Mount Carmel
- Żurrieq Kumpless tan-Nar Madonna tal-Ġilju
- Mqabba Kumpless tan-Nar San Mikiel
- Lija Kumpless tan-Nar San Ġużepp
- Żebbuġ Għaqda tan-Nar San Gabriel
- Tarxien Kummissjoni Nar San Pietru fil-Ktajjen
- Birżebbuġa Għaqda tan-Nar 22 ta’ Frar
