L-ex Segretarju Ġenerali tal-Partit Nazzjonalista Pawlu Borg Olivier fetaħ attakk dirett fuq id-deputat Nazzjonalista Kristy Debono u qal nies bħalha mhumiex posthom fil-politika.
Borg Oliver li ġej mill-fazzjoni tal-ex Kap Nazzjonalista Simon Busuttil qal dan b’reazzjoni għal rapport f’The Times fejn ġie rrapportat li Debono u bosta deputati oħra Nazzjonalisti b’impjieg mal-Gvern ntalbu jirrapportaw għax-xogħol mal-entità governattiva li jaħdmu magħha. Dan wara li ftit li xejn kienu jersqu għax-xogħol.
Fil-messaġġ tiegħu, Borg Olivier qal li Debono jmissha tistħi li ma kinitx qiegħda tirrapporta għax-xogħol. Qal li politiċi bħala mhumiex ta’ eżempju tajjeb u m’għandhomx posthom fil-politika.
Huwa żied jakkużaha li qiegħda tabbuża mill-pożizzjoni tagħha ta’ deputat parlamentari.
Borg Olivier żied jiżvela li Debono ilha nieqsa wkoll mill-Partit Nazzjonalista fuq leave tal-mard sforzat wara l-laqgħa li kellha ma’ Yorgen Fenech, is-suspettat mandat fil-qtil ta’ Daphne Caruana Galizia.
Borg Olivier żied jgħid li jekk il-Partit Nazzjonalista mmexxi minn Delia jrid jippriedka dwar governanza tajba, din għandha tibda minn ġew forsi jibdew jiksbu xi ftit tal-kredibbiltà.
B’reazzjoni għal dan, il-fazzjoni ta’ Delia ħarġet tfakkar fl-iskandli kien involut fihom Borg Olivieri nnifsu meta kien Segretarju Ġenerali tal-Partit Nazzjonalista.
Fost oħrajn fakkru meta mar għall-btala fuq il-jott lussuż tal-kuntrattur Żaren Vassallo, li kien jingħata bosta kuntratti pubbliċi fl-istess waqt kien wieħed mis-sostenituri finanzjarjarji kbar tal-Partit Nazzjonalista.
Fl-2010 Borg Olivier flimkien ma’ martu nqabdu fuq il-jott lussuż ta’ Vassallo fi Sqallija. Huwa kien iġġustifika dan iż-żjara għax qal li kien fil-kapaċità personali tiegħu fuq dgħajsa ta’ ħabib.
Din kienet it-tieni darba li segretarju ġenerali tal-partit nazzjonalista kien inqabad għal btala ma’ Vassallo.
Fost oħrajn, il-kumpanija ta’ Vassallo kienet ingħatat il-kuntratt minn gvern nazzjonalista biex tagħmel ix-xogħlijiet ta’ kostruzzjoni tal-power station tal-BWSC li kienet taħdem bil-Heavy Fuel Oil.
F’investigazzjoni li saret mill-Awditur Ġenerali fuq il-kuntratt korrott tal-power station, l-Awditur qal li kien hemm id-duħħan iżda ma nstabx in-nar.
Dan għall-fatt li ma sabx koperazzjoni min-nies involuti biex jagħtuh l-informazzjoni meħtieġa fosthom mill-aġent Malti tal-BWSC.
