Malta kienet fost numru żgħir ta’ pajjiżi li kellhom il-Budget tagħhom approvat mill-Kummissjoni Ewropea mingħajr ma ntalbu jieħdu ebda miżuri biex jiġu konformi mar-regoli Ewropej.
B’hekk mhux biss il-Budget kien approvat, iżda għal darb’oħra ngħata ċertifikat ta’ kredibbiltà għal pajjiżna fis-settur tal-immaniġġjar tal-finanzi pubbliċi.
Fost Budgets li ma ngħatawx l-istess ċertifikat ta’ Malta kien hemm dawk tal-Awstrija, il-Litwanja, il-Ġermanja, l-Estonja, il-Lussemburgu, l-Olanda, l-Islovenja u l-Islovakkja.
Per eżempju fir-rapport tal-Kummissjoni Ewropea lill-Ġermanja, il-konklużjoni hija li l-pajjiż ġgant fl-Unjoni Ewropea irid jieħu ċertu miżuri biex jiġi konformi.
“The Commission invites Germany to take the necessary measures within the national budgetary process to ensure that the 2023 budget is consistent with the recommendation adopted by the Council on 12 July 2022,” qalet il-Kummissjoni Ewropea fir-rapport li ntbagħat Berlin.
Bħal Malta kellhom approvazzjoni mingħajr diffikulta ħames pajjiżi oħra li huma il-Finlandja, l-Irlanda, Ċipru, il-Kroazja u l-Latvja.
Il-konferma tal-Budget tingħaqad ma’ rapporti oħra li taw ċertifikat b’saħħtu lil Malta.
Fil-fat, it-TORĊA rrapportat fil-ħarġa tal-Ħadd li f’ħames ġimgħat ħarġu ħames rapporti b’saħħithom u pożittivi dwar l-ekonomija Maltija. Kollha minn entitajiet jew aġenziji internazzjonali.
L-approvazzjoni tal-Budget tikkuntrasta wkoll bil-kbir mar-reazzjoni tal-Oppożizzjoni li qalet li dan kien Budget in the red.
Ir-rapport finali tal-Kummisjoni Ewropea jgħid li “overall, the Commission is of the opinion that the Draft Budgetary Plan for Malta is in line with the fiscal guidance contained in the Council recommendation of 12 July 2022.”
Iktar minn hekk il-Kummissjoni Ewropea għandha fiduċja fil-miri li tpoġġew fil-Budget tal-Gvern, li offra ċertezza u stabbiltà.
Budget li kien miżgħud ukoll b’miżuri soċjali fosthom żidiet fil-pensjonijiet u ċ-childrens allowance u mekkaniżmu ġdid ta’ għajnuna kontra l-għoli tal-ħajja għall-iktar vulnerabbli.
