Il-Bank of Valletta qed ifittex li jimpjega madwar 50 impjegat ġdid li jkunu f’kuntatt dirett mal-klijenti mill-fergħat li għandu madwar Malta u Għawdex jew pemezz tal-Customer Service Centre. Dan huwa sforz iffukat u intiż biex isaħħaħ is-servizz mill-punti kollha li minnhom jinteraġixxi mal-klijenti. Dan l-isforz huwa xhieda tal-impenn tal-Bank li joffri servizz effiċjenti u ta’ kwalità għolja minn kull fejn jaqdi l-klijenti, u b’hekk ikun konformi mal-għan ewlieni tiegħu li dejjem itejjeb il-livell ta’ sodisfazzjon tal-klijenti.
Il-BOV investa b’mod qawwi f’soluzzjonijiet diġitali u f’teknoloġiji li joffru servizzi bankarji konvenjenti lill-klijenti tiegħu. Minkejja dawn l-avvanzi, il-Bank jirrikonoxxi l-firxa vasta ta’ bżonnijiet li għandhom il-klijenti u l-importanza tal-kuntatt uman. Dan il-kuntatt il-Bank qed ikompli joffrih mill-katina ta’ fergħat li għandu madwar Malta u Għawdex, kif ukoll permezz taċ-ċentru tal-Customer Service Centre.
Ray Debattista, Chief People & Culture Officer tal-Bank of Valletta, qasam xi ħsibijiet dwar l-isforzi tal-Bank f’dan ir-rigward. Huwa stqarr li, “Matul dan l-aħħar, konna ffukati biex intejbu l-esperjenza tal-klijenti tagħna permezz ta’ sensiela ta’ inizzjattivi. Dawn kienu jinkludu titjib fil-flotta tal-ATMs, xogħol ta’ rinovar li għaddej fil-fergħat tagħna, kif ukoll it-tnedija ta’ sistema onlajn li permezz tagħha wieħed jaghmel appuntament mal-fergħa li jixtieq. Dan kollu kien possibli billi fittixna u smajna x’kellhom x’jgħidu l-klijenti tagħna permezz tal-programm Voice of the Customer. Iċċelebrajna wkoll ġimgħa ddedikata lill-Esperjenza tal-Klijent madwar il-fergħat tagħna, ġimgħa li tat xhieda tal-impenn qawwi tagħna. Issa, qegħdin nirrikonoxxu li l-pass naturali li jmiss huwa propju li nsaħħu t-tim tagħna f’dawn il-punti ta’ kuntatt mal-klijenti, biex b’hekk verament insaħħu l-esperjenza tal-klijenti.”
Il-BOV jimpjega ‘l fuq minn 2,100 impjegat u huwa l-ikbar kumpanija fis-settur privat li tħaddem impjegati magħha. Minbarra li joffri salarji attraenti, il-Bank joffri wkoll firxa wiesgħa ta’ benefiċċji lill-impjegati tiegħu. Dawn jinkludu rati tal-imgħax baxxi fuq self għad-djar u self personali, kards ta’ kreditu b’xejn, tneħħija ta’ miżati minn fuq bosta servizzi bankarji, polza tal-assigurazzjoni fuq is-saħħa, inċentivi favur iżjed bilanċ bejn il-ħin tax-xogħol u l-familja, għotjiet ta’ flus sabiex jintefqu fuq il-benesseri tal-impjegati, ġranet addizzjonali ta’ frank, bonuses fuq il-prestazzjoni tal-ħidma, ġranet u għotjiet dedikati għat-tkomplija tal-istudju, opportunitajiet ta’ taħriġ u żvilupp, pjan speċifiku għall-bini ta’ karriera, kifukoll attivitajiet oħra soċjali u ta’ divertiment. Barra minn hekk, riċentament il-BOV introduċa skema ta’ Pensjoni Volontarja, fejn kull kontribuzzjoni li jagħmel l-impjegat b’investiment għall-irtirar, il-Bank iqabbel bl-istess ammont il-kontribuzzjoni tiegħu biex hekk immedjatament l-ammont investit jiġi rdoppjat kull xahar sa ċertu ammont.
Ray Debattista saħaq li “Fil-Bank of Valletta nagħtu priorità lin-nies. Il-klijenti huma l-unika raġuni li għaliha nagħmlu n-negozju, iżda l-impjegati tagħna huma r-raġuni li għaliha għandna l-klijenti. Qed inkomplu ninvestu bi sħiħ fin-nies tagħna, sabiex nipprovdu opportunitajiet ta’ bini ta’ karriera u programmi ta’ żvilupp biex noħolqu ambjent dinamiku. Il-bilanċ bejn il-ħin tax-xogħol u l-familja u l-ġid tal-impjegati tagħna huma ta’ priorità għalina u għandna inizjattivi kull xahar u premijiet kull tlett xhur għall-aqwa impjegati. Nemmnu wkoll bi sħiħ fid-diversità u l-individwalità ta’ kull impjegat b’perspettiva unika li noħolqu post tax-xogħol li jiċċelebra verament l-innovazzjoni u l-inklużjoni.”
Il-Bank of Valletta għandu iktar minn 400 impjegat imqassma madwar 33 fergħa f’Malta u Għawdex, u fil-Customer Service Centre. Kull min hu interessat jingħaqad mat-tim tal-BOV huwa mistieden japplika fuq https://vacancies.bov.com
