Fit-tielet edizzjoni tal-Malta Business Awards, li saret dan l-aħħar, il-Bank of Valletta rebaħ żewġ premjijiet prestiġjużi – il-Premju tad-Deheb għall-Innovazzjoni (Inizjattiva Rebbiegħa) u l-Premju tal-Fidda għall-Impatt Soċjali (Inizjattiva tal-Volontarjat) – li jenfasizzaw l-impenn kontinwu tiegħu li jħalli impatt soċjali pożittiv, filwaqt li jippromwovi s-sostenibbiltà ambjentali permezz tal-attivitajiet tas-corporate social responsability.
L-Inizjattiva Rebbiegħa tal-BOV rebaħ il-premju tad-deheb fil-kategorija Project Green, li turi l-impenn tal-bank għas-sostenibbiltà. Il-programm kien ibbażat fuq il-kollaborazzjoni ma’ Nature Trust, li tiffoka fuq il-konservazzjoni tal-fkieren u jinkludi sistema innovattiva ta’ traċċar bis-satellita u tankijiet speċjali biex jgħinu fil-protezzjoni ta’ dawn il-kreaturi.
Il-Silver Social Impact Award jirrikonoxxi l-Inizjattiva tal-Volontarjat tal-BOV, li tippermetti lill-impjegati jqattgħu ħin volontarju għall-komunitajiet lokali.
Kull impjegat jingħata ġurnata għas-servizz volontarju biex jgħin NGOs f’oqsma, bħall-ambjent, it-trattament xieraq tal-annimali u kawżi soċjali. L-impjegati pparteċipaw f’attivitajiet, bħat-tħawwil tas-siġar, it-tindif u l-għajnuna lil nies vulnerabbli u xelters tal-annimali.
Fil-50 anniversarju tiegħu, il-BOV jirrikonoxxi l-isforzi tiegħu fis-sostenibbiltà u r-responsabbiltà soċjali bil-premjijiet għall-Inizjattiva Rebbiegħa u l-Inizjattiva tal-Volontarjat, li jiffokaw fuq il-bidla pożittiva lil hinn mis-servizz finanzjarju.
