Illum Bank of Valletta sejjaħ Laqgħa Ġenerali Straordinarja. Matul din il-laqgħa, l-azzjonisti tal-Bank approvaw emendi tal-Memorandum u l-Artikli tal-Assoċjazzjoni tal-Bank u żieda tal-kapital azzjonarju tal-kumpanija minn 500 miljun ewro għal biljun ewro. Din iż-żieda fil-kapital azzjonarju hija soġġetta għall-approvazzjoni regolatorja.
Waqt li kien qed jindirizza l-azzjonisti, iċ-Chairman tal-Bank, is-Sur Deo Scerri ta stampa tal-viżjoni strateġika tal-Bank li hija ffokata biex tissalvagwardjia s-sostenibbiltà fit-tul tal-Bank. “Governanza interna tajba u ġestjoni adegwata tar-riskju huma fatturi kruċjali li għandhom impatt sinifikanti fuq is-sostenibbiltà tal-mudell tan-negozju tal-Bank. B’hekk, it-tisħiħ tal-governanza korporattiva huwa proġett ewlieni għall-Bord tad-Diretturi.”
Reviżjoni tal-Memorandum u l-Artikli tal-Assoċjazzjoni tal-Bank
Żviluppi riċenti fir-regolamenti ta’ istituzzjonijiet tal-kreditu fuq livell ta’ Unjoni Ewropeja wasslu biex tinħass il-ħtieġa li l-Memorandum u l-Artikli tal-Bank jiġu riveduti. Il-BOV huwa meqjus bħala bank sistemikament importanti, u b’hekk jaqa’ taħt is-superviżjoni diretta tal-Awtorità Superviżorja Konġunta. Dan it-tim, li huwa magħmul minn uffiċjali tal-Bank Ċentrali Ewropew (BĊE) u tal-MFSA, jissorvelja l-mudell ta’ negozju tal-Bank, il-governanza interna u l-ġestjoni tar-riskju, l-adegwatezza tal-kapital u l-likwidità.
Is-Sur Scerri spjega li r-reviżjonijiet tal-Memorandum u l-Artikli tal-Bank li qed jiġu proposti jafu l-oriġini tagħhom fi proposti mressqa mill-BĊE wara r-reviżjoni tematika li għamlu fost istituzzjonijiet meqjusa ta’ importanza sistemika.
“Il-Memorandum u l-Artikli tal-Bank qatt ma ġew riveduti b’mod komprensiv minn mindu kienu ġew adottati fl-1997. Fid-dawl ta’ żviluppi regolatorji, kif ukoll ta’ tibdil fl-infrastruttura legali, il-Bord ħass li kien il-waqt li l-Memorandum u l-Artikli tal-Kumpanija jkunu reveduti biex b’hekk ikun assigurat li dawn ikunu f’konformità mal-aqwa prattika internazzjonali,” spjega s-Sur Scerri. Fost dawn l-emendi wieħed isib it-twaqqif ta’ Nominations and Governance Committee kif ukoll il-ħatra ta’ Diretturi Eżekuttivi u oħrajn li mhumiex fuq il-Bord tad-Diretturi tal-kumpanija.
Tisħiħ tal-Bażi Kapitali
Bħala bank importanti fuq livell domestiku b’impatt sinifikanti fuq l-istabbiltà finanzjarja lokali, BOV irid ikollu kapaċità akbar biex jassorbi livell ta’ riskju għola minn dawk li jiffaċċjaw banek iżgħar. “B’hekk, il-Bank jeħtieġ bafers ta’ kapital addizzjonali, li huwa ta’ importanza kritika għalina. Inkella, il-Bank mhux ser ikun f’pożizzjoni li jidħol għal investimenti ġodda, jissanzjona self ġdid jew iqassam id-dividend lill-azzjonisti.” Huwa għalhekk li l-Bank qed jippjana biex joħroġ 150 miljun ewro f’kapital azzjonarju ġdid matul it-tmintax –il xahar li ġejjin.
Fit-tmiem tad-diskors tiegħu, iċ-Chairman tal-Bank ġabar fil-qosor il-viżjoni strateġika tal-Bank. “Il-Bank ser ikompli jnaqqas id-dipendenza tiegħu fuq il-marġini tal-imgħax (core interest margin). Sorsi alternattivi ta’ dħul qed jiġu żviluppati biex ikun żgurat tkabbir tan-negozju b’mod sostenibbli u stabbli. Bħala parti integrali tal-pjan tan-negozju tal-Bank, dan ser jippermettilna niżguraw li l-marġini tal-profitt ikunu sostnuti fuq l-istess livelli tal-aqwa banek ewropej. Dan jiżgura dħul konsistenti għall-benefiċċju tal-azzjonisti tagħna.”
