Iċ-Chairman tal-BOV Deo Scerri, akkumpanjat mill-Kap Eżekuttiv Mario Mallia u mis-CFO Elvia George illum indirizza konferenza stampa li matulha ħabbar it-tieni sett ta’ riżultati finanzjarji interim tal-Bank għall-2017.
Bħalma kien imħabbar aktar kmieni, l-2017 hija sena straordinarja għall-Bank of Valletta, minħabba li din is-sena finanzjarja hija magħmula minn 15-il xahar. Dan huwa frott ta’ deċiżjoni li s-sena finanzjarja tal-Bank tinbel u tibda tagħlaq fil-31 ta’ Diċembru, minflok it-30 ta’ Settembru, kif kienet il-prassi sal-lum. Għall-finijiet ta’ trasparenza u biex wieħed ikun jista’ jqabbel, illum il-Bank qed jirraporta riżultati interim għal perjodu ta’ 12-il xahar minn Ottubru 2016 sa’ Settembru 2017.
Il-Grupp Bank of Valletta ħabbar profit qabel it-taxxa ta’ €143.9 miljuni għal dawn it-tnax il-xahar. Dan ifisser żieda ta’ 21.5% fuq il-profitt aġġustat qabel it-taxxa ta’ €118.4 miljuni li kien irrapurtat għall-istess perjodu s-sena l-oħra. Is-sena l-oħra il-Bank kien iddikkjara profitt ta’ darba li kien jammonta għal €27.5 miljuni. Dan il-qligħ kien riżultat tal-akkwist tal-Grupp VISA, li tiegħu l-BOV kien membru ewlieni, minn VISA Inc.
Iċ-Chairman qal li wieħed għandu jinterpreta r-riżultati tal-Bank fl-isfond tal-ekonomija lokali li sejra tajjeb ħafna, anke meta wieħed iqabbilha mal-istandards tal-Unjoni Ewropea. Fl-istess waqt wieħed irid ukoll iqis ix-xenarju internazzjonali fejn il-marġini tal-imgħax baqgħu f’livelli baxxi ħafna, u dan ifisser sfida sinifikanti għall-Bank.
“Id-deċiżjoni strateġika li ħa l-Bank biex jiddiversifika id-dħul tiegħu qed tħalli l-frott,” stqarr Deo Scerri. “Fil-fatt, l-operat tal-Bank, kemm fin-negozju tal-kards kif ukoll f’dak tal-investimenti kien wieħed tajjeb. Madankollu, dan kien innewtralizzat xi ftit mill-marġini tal-interessi baxxi ħafna u minn livelli għoljin ta’ likwidità. Fl-istess waqt, il-Bank kellu jagħmel tajjeb għal żieda fl-ispejjeż tiegħu, marbuta l-aktar mal-investiment fir-Riżorsi Umani, fl-IT u ż-żieda fir-regolamentazzjoni. Dawn kienu relatati l-aktar mal-implimentazzjoni ta’ programm li ser iwassal biex il-Bank ibiddel is-sistemi bankarji prinċipali tiegħu kif ukoll minħabba rekwiżiti ġodda ta’ regolamentazzjoni li huma stretti ħafna.” Is-Sur Scerri spjega wkoll li l-mod aktar proattiv ta’ kif il-Bank qed jitratta non performing loans li jmorru lura diversi snin wassal biex il-Bank irrevoka l-ekwivalenti ta’ €7.5 miljuni f’impairment charges.
Sadanittant, is-sehem tal-Bank mill-profitti ta’ Mapfre MSV Life żdied b’mod sinnifikanti u tela’ għal €14.5 miljuni (SF 2016: €3.7 miljuni).
Ħarsa mill-qrib lejn il-karta tal-bilanċ tal-Bank turi li d-depożi tal-klijenti komplew jiżdiedu, tant li telgħu għal €10.1 biljun, f’ambjent fejn il-preferenza tas-suq għal depożiti fuq terminu qasir kompliet tippersisti hekk kif il-Bank implimenta proċeduri aktar stretti għal klijenti li japplikaw biex jibdew relazzjoni miegħu. Fl-istess waqt is-self nett tal-Grupp tela’ bi ftit u illum ilaħħaq l-€4.4 biljuni, bis-self fuq id-djar jirrapreżenta 42% tas-self kollu fuq il-kotba tal-Bank.
Il-Core Equity Tier 1 ratio tal-Bank huwa ta’ 13.4%, ’il fuq minn 12.8% li kien irrapurtat f’Settembru 2016. Hawnhekk iċ-Chairman għamel referenza għal ħruġ imminenti ta’ ishma bi dritt, li ser jippermettu lill-Grupp isaħħaħ il-bażi kapitali tiegħu. “Dan il-pass huwa meħtieġ mhux biss minħabba li l-Bank huwa meqjus bħala istituzzjoni finanzjarja sistemikament importanti għal Malta, imma wkoll biex jippermettilna nkunu f’pożizzjoni aħjar li nżidu self ġdid, nidħlu għal investimenti ġodda u nqassmu dividends lill-azzjonisti tagħna,” stqarr Deo Scerri.
Fil-kummenti tal-għeluq tiegħu, iċ-Chairman tal-BOV esprima s-sodisfazzjoni tiegħu bl-andament tal-Bank u qal, “Fis-snin li għaddew, il-Bank ħa numru ta’ deċiżjonijiet iebsin u illum qiegħed jinvesti bil-kbir fin-nies u fis-sistemi tal-IT biex jiżgura li jibqa’ validu, kompetittiv u sostenibbli fit-tul. Sadanittant aħna rrevedejna l-mudell tan-negozju tagħna kif ukoll il-qafas tal-aptit tar-riskju biex niżguraw li dawn huma fattibli, relevanti u jaqblu mal-viżjoni strateġika tal-Bank fit-tul.” Is-Sur Scerri ikkonferma li l-Bank diġa beda jirċievi rispons tajjeb ħafna mis-suq, 24 siegħa wara li kienet ippubblikata il-Company Announcement bid-dettalji tal-ħruġ tal-ishma. Huwa stqarr li dan huwa pass importanti fil-vjaġġ tal-Bank biex jibqa’ relevanti u validu bħala sieħeb finanzjarju għall-klijenti tiegħu fil-futur.”
