Il-gazzetta l-Orizzont irrappurtat storja li l-grupp ta’ deputati li jsejħu lilhom infushom bħala ‘blue heroes’ qed jużaw lill-eks Kap Simon Busuttil biex ikomplu jżidu l-kontroll fuq il-Kap attwali tal-Partit Nazzjonalista, Bernard Grech.
Bernard Grech kien intgħażel mill-fazzjoni mmexxija mid-deputati Jason Azzopardi u Karol Aquilina u kemm ilu fit-tmexxija ħa ħsieb li kemm jista’ jkun ma jurtax lid-deputati li jagħmlu parti mill-grupp tal-Blue Heroes.
Fid-dawl anki li Simon Busuttil qed ikun iżjed viżibli fil-midja, il-ġurnal l-Orizzont irrapporta li din qed twassal għal skumdità min-naħa tal-Kap Bernard Grech għax din is-sitwazzjoni qed tkompli timmina r-relevanza tiegħu fil-beraħ.
L-Orizzont isemmi stħarriġ tal-opinjoni pubblika wara ieħor li juru li l-poplu mhux qed iħares lejn Bernard Grech bħala l-persuna li tista’ tmexxi lil dan il-pajjiż.
Intqal kif bħalissa Simon Busuttil qed jikkordina dehriet kontinwi fil-midja.
Fil-fatt Busuttil kiteb fit-Times u anki kellu intervisti kontinwi fuq siti fejn il-‘blue heroes’ għandhom kuntatti tajbin.
Imbagħad ilbieraħ filgħaxija Simon Busuttil deher fuq il-programm l-Erbgħa Fost il-Ġimgħa.
Fl-isfond ta’ dan kollu, il-manuvri ta’ Simon Busuttil u l-Blue Heroes għokru għajnejn il-ġurnalisti u meta mistoqsi dwar din l-insistenza ta’ Busuttil u jekk hux se jerġa’ joħroġ, Bernard Grech qal biss, “Staqsu lilu.”
Sorsi tal-gazzetta l-Orizzont fil-grupp parlamentari Nazzjonalista qalu wkoll kif għal Bernard Grech din hi sitwazzjoni frustranti għax bir-rikatt li kien sarlu pubblikament minn Manuel Delia, hu diġà kellu l-awtorità tiegħu mminata.
Fil-fatt ftit minuti wara li tela’ Kap flok Adrian Delia, l-eks Chief of Staff ta’ Austin Gatt kiteb lil Bernard Grech biex ma jgħaxxaqhiex għaliex inkella malajr isibu lil ħaddieħor.
Ir-rapport tal-Orizzont għalaq billi semma kliem il-Kap Bernard Grech nhar il-Ħadd li għadda, li biex xi ħadd li kisirha mal-fazzjoni, jidħol lura fil-Partit Nazzjonalista, l-ewwel irid jiġi rijabilitat.
Din id-dikjarazzjoni waslet biex Bernard Grech iffaċċja kritika qawwija minn ċertu nies li sostnew kif għandu jkun il-Partit Nazzjonalista li jirrijabilita lilu nnifsu u mhux min telaq għax ħass li l-partit naqas.
Iżda din id-dikjarazzjoni, Bernard Grech kien kostrett jagħmilha għax il-fazzjoni li dejjem iddettat fil-Partit Nazzjonalista għamlitielu ċara li ma jistax jitfa’ t-tort għal dak li ġara qabel fuq min kien qed imexxi l-Partit Nazzjonalista.
