Il-gazzetta KullĦadd żvelat li fl-aħħar jiem, xi deputati Nazzjonalisti tal-fazzjoni ta’ Simon Busuttil, li kienu sejħu lilhom infushom bħala ‘blue heroes’, iltaqgħu minn wara dahar il-Kap Bernard Grech biex jiddeċiedu kif se jżidu l-pressjoni fuq Grech u jassiguraw li jsir biss dak li jridu huma.
Il-gazzetta KullĦadd irrappurtat li l-ispirtu tal-laqgħa mingħajr il-Kap kien li għalkemm Bernard Grech b’mod ġenerali qed isegwi dak li jitolbuh tal-fazzjoni Busuttil, hemm oqsma fejn qed jippretendu li jkun iktar aggressiv fl-attakki tiegħu u għamluha ċara li jekk ma jiġrix hekk, Bernard Grech għandu jistenna anke pressjoni fil-pubbliku.
Fuq quddiem nett f’din il-laqgħa kien hemm Jason Azzopardi, li kien hu li ħareġ b’tal-blue heroes.
Fil-laqgħa ntqal li hu importanti li kontinwament Bernard Grech jiġi mfakkar min poġġih hemm u għaliex.
Il-gazzetta semmiet kif bħalma d-deputati ta’ Busuttil ma ħallewx lil Bernard Grech jagħmel reshuffle kif xtaq hu fix-shadow cabinet, lil Grech mhux se jħalluh jitlaq minn dak li wiegħed biex ħa post Adrian Delia fit-tmexxija tal-Partit Nazzjonalista.
Xhieda tal-klima turbulenti fil-Partit Nazzjonalista ħarġet meta ġurnalist tat-Times li bosta jiddeskrivuh bħala qrib ħafna ta’ Jason Azzopardi, il-Ħamis filgħodu mar jagħfas lil Bernard Grech fuq Pierre Portelli u Adrian Delia.
Ftit wara tah twissija fuq il-blog tiegħu l-eks chief of staff ta’ Austin Gatt, Manuel Delia.
Fil-fatt fil-blog tiegħu, l-esponent tal-Occupy Justice u Repubblika, irrefera għal dak li wieġeb Bernard Grech fuq Adrian Delia u Pierre Portelli u qal li jeżiġi aħjar minn Grech.
Imbagħad filgħaxija Bernard Grech mar ukoll quddiem Kastilja jixgħel ix-xemgħat u jippolitiċizza l-Covid-19 f’mossa li tfakkar fl-inizjattivi ta’ Occupy Justice.
Is-sorsi tal-gazzetta KullĦadd viċin il-Blue Heroes spjegaw ukoll li din il-ġimgħa kienet biss l-ewwel twissija f’każ li Bernard Grech jaħseb li se jinsa minn poġġih hemm.
L-istess gazzetta vverifikat ma’ sorsi fid-Dar Ċentrali li qalu li jinsabu sorpriżi bl-attitudni tal-Kap meta wieħed jiftakar li Bernard Grech anke fuq ir-reshuffle kien kostrett iċedi u fuq kollox aċċetta li jdaħħal lill-idolu tal-fazzjoni ta’ Simon Busuttil, Richard Cachia Caruana, fl-istrateġija tal-partit.
Intant bil-għan li jingħoġob ma’ tal-establishment, il-Ħamis filgħaxija Bernard Grech talab li jitneħħa kull ħsieb li jibdew proċeduri interni kontra Simon Busuttil wara li dan bena kampanja bbażata fuq kalunja u l-gidba Egrant.
B’reazzjoni għal din l-aħħar mossa, f’ġimgħa li indikat kemm il-Kap Nazzjonalista kellu idu milwija biex jagħmel eżatt dak li jrid l-Establishment, fi stqarrija l-Partit Laburista ddikjara li jekk qatt kien hemm dubju min imexxi fil-Partit Nazzjonalista, dan inqata’ fl-Amministrattiv tal-Partit Nazzjonalista.
Ġie sostnut li Bernard Grech hu l-ostaġġ ta’ min poġġieh fil-kariga.
