L-establishment Nazzjonalista għaddej b’manuvri minn wara l-kwinti sabiex ikomplu jikkonsolidaw il-pożizzjoni tagħhom fil-partit.
Żvelat dan il-gazzetta KullĦadd tal-Ħadd, li qalet kif l-establishment Nazzjonalista qed jagħmel minn kollox biex itajjar l-aħħar elementi fit-tmexxija tal-partit li huma assoċjati mar-rivoluzzjoni mitlufa ta’ Adrian Delia.
Dan b’referenza għaż-żewġ Viċi Kapijiet tal-Partit Nazzjonalista Robert Arrigo u David Agius.
B’dawn kienu destinati li jiġu ssagrifikati fuq l-altar, anki jekk ftit li xejn kellhom x’jaqsmu mal-akbar disfatta tal-Partit Nazzjonalista mill-Indipendenza ’l hawn.
Hawnhekk il-gazzetta KullĦadd innutat kif l-istrateġija tal-establishment għandha tliet miri ewlenin.
L-ewwel mira kienet li l-esponenti tal-establishment inaqqsu kemm jistgħu mit-telfa kbira li ġarrab il-Partit Nazzjonalista. Dan hekk kif dawk viċin l-establishment ilhom minn dakinhar tar-riżultat jipprovaw jaqbdu ma’ kull skuża possibli, fosthom li l-Partit Laburista rebaħ l-elezzjoni minħabba “manipulazzjoni tal-poplu permezz tas-saħħa tal-poter” u “użu abbużiv tax-xandir nazzjonali”.
It-tieni mira kienet li l-magħżul tal-establishment Bernard Grech jidher li rnexxielu jwettaq il-missjoni li jnaqqas id-distakk bejn iż-żewġ partiti. Qabel l-elezzjoni bdew jiffukkaw fuq li d-distakk fil-voti jkun inqas minn dak tal-elfejn u sbatax, iżda dak mar żmerċ u issa qed iqabblu ma’ kif kienu taħt l-eks Kap Nazzjonalista Adrian Delia.
It-tielet mira tal-establishment imsemmija mill-gazzetta KullĦadd hija dik li jippuntaw subgħajhom lejn il-fazzjoni ta’ Delia. Skont din in-narrattiva, it-tort ta’ din it-telfa hi l-fazzjoni tal-eks Kap, li ħadmet kontra l-linja tal-partit. Hawnhekk kellek dawk li qalu li l-eks deputati Nazzjonalisti li ma ħarġux għall-elezzjoni affettwaw ir-riżultat, b’mod speċjali fis-sitt u d-disa’ distrett.
Waqt il-kampanja elettorali, l-establishment Nazzjonalista għamlet minn kollox biex jaħbu liż-żewġ Viċi Kapijiet, hekk kif kważi ma dehru mkien. B’din l-istrateġija jidher li kellha suċċes, hekk kif it-tnejn naqqsu l-voti meta mqabbel ma’ ħames snin ilu.
B’dawn it-tnejn għall-establishment huma l-ħaruf tas-sagrifiċċju. B’dan juri li ma jiswa xejn il-fatt li Arrigo kien kruċjali biex is-sitwazzjoni finanzjarja tal-partit terġa’ b’xi mod tinġieb aħjar, wara l-ħela li kien hemm taħt it-tmexxija ta’ Simon Busuttil.
B’Arrigo jgħid li mhux se jkun qed jikkontesta għall-ebda kariga fil-Partit Nazzjonalista, waqt li hawnhekk fl-istess ħin qed tkompli tiżdied il-pressjoni fuq David Agius biex anki hu jwarrab.
Il-gazzetta kompliet tgħid kif minkejja li ħafna jaħsbu li l-fazzjoni tal-Blue Heroes ħadet daqqa, xorta waħda għad għandhom is-saħħa fil-partit. Sorsi mid-Dar Ċentrali qalu mal-gazzetta KullĦadd kif bit-tneħħija ta’ Arrigo u Agius, il-pjan tal-Blue Heroes ikun irnexxa.
