Il-Kumitat Soċjali fi ħdan il-Birżebbuġa Aquatic Sports Club b’donazzjoni ta’ €200 lis-Santwarju tal-Annimali Abbandunati f’Birżebbuġa.
Id-donazzjoni, li saret f’isem il-Birżebbuġa Aquatic Sports Club, għas-santwarju nġabret mill-biljetti li nbiegħu għall-attività Pizza & Pasta Night organizzata mill-Kumitat Soċjali.
Il-kumitat, li l-għan tiegħu huwa li matul is-sena jorganizza diversi attivitajiet bil-għan li jinġabru fondi għall-istess klabb, ħaseb sabiex parti mid-dħul ta’ din l-attività li għaliha attendew il-membri tal-klabb kif ukoll diversi ħbieb oħra, isservi bħala ġbir ta’ fondi għas-santwarju li jilqa’ fih ‘il fuq minn 80 kelb li jkun abbandunat.
Id-donazzjoni ingħatat lil Rosalind Agius li tmexxi s-santwarju flimkien ma’ għadd ta’ voluntiera. Il-kumitat żar ukoll is-santwarju fejn seta’ jara x-xogħol li jsir b’tant dedikazzjoni biex l-annimali, li jkunu għaddew minn trawma, jinżammu fl-aħjar kundizzjonijiet.
Il-Kumitat Soċjali jixtieq jgħaddi l-messaġġ li bħalma għamlu huma, jkun hemm aktar għaqdiet kif ukoll individwi li jagħtu d-donazzjonijiet tagħhom lis-Santwarju għall-Annimali Abbandunati f’Birżebbuġa.
Ritratti: Ayrton Bonnici
