B’arroganza u bi sfida diretta lejn il-liġi u l-awtoritajiet Maltin, il-Birdlife kompliet tagħmel ħsara u tipperikola l-pożizzjoni tal-Gvern Malti dwar ir-riċerka fuq l-għasafar tal-għana.
Dan iddikjaratu l-Federazzjoni Kaċċaturi Nassaba u Konservazzjonisti, l-FKNK, fi stqarrija oħra, fil-kwistjoni dwar bird-ringer kwalifikat Irlandiż, li tqabbad mill-Gvern Malti biex jassisti fir-riċerka dwar l-għasafar tal-għana.
L-FKNK qalet li l-BirdLife għandha tieqaf taħseb li hi ’l fuq mill-awtoritajiet jew l-istat Malti, li jħaddem saltna tad-dritt, u għandha tieqaf timmaġina li hi biss tista’ tirriċerka l-għasafar tal-passa.
L-FKNK qalet li l-Birdlife Malta wettqet attakk malizzjuż, ibbażat fuq il-qerq, meta bagħtet lill-British Trust for Ornithology dwar dan il-bird-ringer u insinwat li l-Gvern Malti m’għandux raġuni xjentifika leġittima biex jawtorizza r-riċerka.
Dan wassal biexl-organizzazzjoni Britannika tissospendi l-permess li kienu ħarġu lill-Irlandiż u heddet lil detenturi oħrajn bil-permess ta’ bird-ringer b’miżuri dixxiplinarji simili jekk xi ħadd minnhom jażżarda jassisti lill-istess programm tar-riċerka ta’ pajjiżna.
Fid-dawl ta’ dan kollu, l-FKNK staqsiet lill-Gvern kif se jirreaġixxi fil-konfront tal-organizzazzjoni Britannika għal din il-miżura vendikattiva instigata mill-Birdlife u meta se jieħu azzjoni konkreta biex ineħħi l-monopolju tal-bird-ringing li għandha l-istess Birdlife f’pajjiżna.
Il-federazzjoni qalet li dan il-monopolju nkiseb mill-Birdlife ħafna snin ilhu taħt ċirkostanzji dubjużi, xi ħaġa li jeżisti biss f’Malta u fl-ebda pajjiż ieħor Ewropew. Dan ukoll wassal biex fl-aħħar żmien, il-Birdlife irrifjutat li tipprovdi ċ-ċrieket lill-bird-ringer biex jagħti servizz komplut lill-Wild Birds Regulation Unit, id-WBRU, anke wara li kienet qablet li tagħmel dan f’laqgħa tal-Kumitat Ornis.
Ma’ dan, l-FKNK semmiet kwistjoni li d-WBRU ħarġet liċenzja lokali lill-bird-ringer Irlandiż, iżda ma setax jimxi mal-kundizzjonijiet minħabba l-arroganza tal-Birdlife, waqt li fakkret li, f’każ li nassab jew kaċċatur ma jimxix mal-liċenzja rispettiva, jiffaċċja multi ta’ eluf kbar ta’ ewro u pieni ħorox, inkluż priġunerija.
Fl-aħħarnet, il-FKNK tinsisti li hu inaċċettabbli li entità f’pajjiżna, li hi obbligata li tikkopera, tibqa’ tirrifjuta dan u saħansitra tisfida l-liġijiet u lill-Gvern Malti.
