Il-baġit se jkompli jsostni lill-‘middle class’ bit-twessigħ tal-faxex tat-taxxi.
Dan qalu l-Prim Ministru u Mexxej tal-Partit Laburista, Robert Abela, f’intervista fuq ONE Radio l-Ħadd filgħodu, mill-ġurnalista ta’ ONE News, Shanaya Farrugia.
Il-Prim Ministru kien mistoqsi dwar il-qagħda ekonomika ta’ pajjiżna, b’mod partikolari dwar il-ġejjieni, fejn tenna kif il-baġit li jmiss se jkollu miżuri intenzjonati biex ikomplu jwieżnu lill-klassi medja ta’ pajjiżna.
ROBERT ABELA – PRIM MINISTRU
“Dak li qegħdin naraw huwa l-ikbar tax cut li qatt ingħatat fl-istorja ta’ pajjiżna u li se tiġi mħabbra fil-baġit li ġej. Jiġifieri fil-baġit li ġej, li se jkun f’Ottubru ta’ din is-sena, se naraw li nwessgħu t-tax bands, b’mod u manjiera li ninċentivaw lill-middle class. Mhux biss il-middle class se tkun qiegħda tgawdi, imma se tkun qed tgawdi sew ukoll il-middle class.”
Din il-miżura se tikkumplimenta miżuri oħra li ntroduċa l-Gvern f’diversi oqsma, li laqtu faxex differenti tas-soċjetà. Però, il-Prim Ministru sostna kif din se tkun miżura intiża li tkompli tagħti l-kuraġġ lil dawn in-nies biex jimxu ’l quddiem.
Dr Abela qal dan meta kien qed iwieġeb mistoqsija dwar l-inflazzjoni, fejn semma l-miżuri li wieżnu lill-familji u lin-negozji Maltin u Għawdxin waqt l-isfidi internazzjonali fl-aħħar snin.
Il-Prim Ministru tenna kif il-Gvern għaddej b’ħidma biex jinċentiva investiment ta’ kwalità, u nnota li l-qagħda ekonomika ta’ pajjiżna hi differenti minn kif kienet qabel l-2013.
Hawn tkellem dwar l-importanza li l-postijiet tax-xogħol jimtlew minn żgħażagħ Maltin u Għawdxin wara li jkunu temmew l-edukazzjoni tagħhom, liema settur ukoll qed jaħdem id f’id biex jirrispondi għall-ħtiġijiet ekonomiċi tal-pajjiż.
Fejn jidħol l-investiment, il-Prim Ministru dawwar ħarstu b’mod partikolari fuq l-istart-ups.
ROBERT ABELA – PRIM MINISTRU
“Issa x’qed naraw fl-istart-ups, ikollok l-aġenzija responsabbli fuq livell Ewropew tal-istart-ups li turik kif pajjiżna huwa wieħed mill-ewwel erba’ pajjiżi li jirnexxilu jinċentiva u jiġbed start-ups lejh, dik hija xi ħaġa fenomenali. Kif tibda start up? Ħafna minnhom huma ħolma ta’ żagħżugħ jew żagħżugħa, jew grupp żgħir ta’ żgħażagħ hemm diversi li ltqajt magħhom f’dawn l-aħħar xhur li jkollhom ħolma.”
Kien hawn li Dr Abela sellem il-ħidma sfieqa li għaddejja f’dan il-qasam mill-Malta Enterprise, li sservi ta’ spalla biex dawn l-ideat f’oqsma innovattivi jsiru realtà.
Il-Prim Ministru, iżda nnota attakk riċenti tal-Oppożizzjoni dwar il-ħatra ta’ George Gregory bħala Kap Eżekuttiv ta’ din l-entità.
ROBERT ABELA – PRIM MINISTRU
“U l-Oppożizzjoni toħroġ tattakkah purament għaliex assuma kariga li biha se jkun qed jaħdem fl-interess nazzjonali. Inkedibbli, Oppożizzjoni li tipprova tattakka nies ta’ integrità u professjonalità imbagħad fl-istess waqt hi Oppożizzjoni li kif rajna mħabbar dalgħodu tibqa’ filwaqt li tippriedka l-korrettezza hi stess terġa’ ma tissottomettix l-audited accounts tagħha lill-Kummissjoni Elettorali.”
Dr Abela tkellem ukoll dwar it-tiġdid fil-Partit Laburista.
ROBERT ABELA – PRIM MINISTRU
“In-numru ta’ kandidaturi li għandna għall-Eżekuttiv Nazzjonali, xi ħaġa li verament impressjonatni b’mod pożittiv u jurik kemm hemm entużjażmu u għatx ta’ nies biex jagħtu kontribut pożittiv lil dan il-moviment, dik xi ħaġa li verament timlini bil-kuraġġ. L-istess fejn tidħol l-amministrazzjoni tal-Partit, tara dan l-entużjażmu ta’ nies li diġà kienu fil-kariga u demm ġdid ukoll.”
Hawn il-Mexxej Laburista feraħ b’mod partikolari lill-Ministru Ian Borg u lill-Ewroparlamentari Alex Agius Saliba għall-ħidma li mistennija jwettqu fil-karigi ta’ Deputati Mexxejja.
Dan filwaqt li saħaq kif dan it-tiġdid huwa kruċjali li jsir, anki waqt li l-Partit qiegħed fil-Gvern, biex ikompli jwieġeb għall-ħtiġijiet tal-poplu Malti u Għawdxi kollu.
