L-attakki koordinati mill-establishment tal-Partit Nazzjonalista komplew fil-konfront tal-kandidat Joe Giglio, din id-darba bl-għajnuna ta’ Repubblika u alleati oħra.
Il-gazzetta KullĦadd irrapportat kif Manuel Delia daħal jgħin f’dawn l-attakki u kompla jqajjem dubji fuq l-avukat Giglio permezz tal-blog tiegħu.
Biex jiddefendi dawk magħrufa bħala l-Blue Heroes, Manuel Delia semma kif huwa “dnub” li Giglio se jikkontesta fuq id-disa’ u l-għaxar distrett, għaliex se jhedded esponenti tal-istess grupp.
Fost dawk l-aktar f’riskju f’dawn id-distretti hemm Jason Azzopardi u Karol Aquilina.
Fuq id-disa’ distrett tefa’ ħarstu Jason Azzopardi, wara li qed jaffaċċja theddida oħra fuq ir-raba’ distrett.
Min-naħa l-oħra, l-għaxar distrett huwa ta’ uġigħ ta’ ras għal Karol Aquilina meta fl-aħħar elezzjoni tela’ minn dan id-distrett wara li baqa’ l-art fis-sitt distrett.
Iżda Manuel Delia, biex ikompli jgħin lill-establishment, attakka wkoll il-karriera professjonali ta’ Giglio. Huwa staqsa għaliex partit bħall-Partit Nazzjonalista jaċċettah wara li jirrappreżenta baruni tad-droga.
Is-segwaċi ta’ Delia rrispondew għal dak li qal fuq il-blog, f’interpretazzjoni li l-attakk qed imur tajjeb ma’ dawk li jimxu wara l-establishment tal-Partit Nazzjonalista.
Fost il-kummenti kien hemm dawk ta’ sapport lejn l-establishment. Hawnhekk issemma kif Giglio ma ħaqqux ikollu rwol fil-Partit Nazzjonalista jew fil-Parlament.
Kien hemm ukoll min qabbel lil Giglio mad-“De Marco Clan”; eku ta’ kampanja li ilha għaddejja s-snin fi ħdan il-partit biex ċerti persuni ikunu emarġinati.
L-attakk fil-konfront ta’ Giglio ilu għaddej fosthom fil-Kumitat tal-Kontijiet Pubbliċi fil-Parlament u fil-block vote li wħud ikkordinaw biex jagħmlu aktar ħsara lil Giglio.
Però fil-każ tal-block vote ma rnexxiex l-isforz tal-establishment hekk kif Giglio xorta waħda tela’ b’saħħa fl-Eżekuttiv tal-Partit Nazzjonalista.
Konxju ta’ dawn l-attakki, Giglio kkontesta u sussegwentement tela’ fl-Eżekuttiv biex ikollu sieq f’organu għoli tal-partit fejn ikun jista’ jiddefendi lilu nnifsu mill-istess establishment.
Dan l-attakk fil-konfront ta’ Joe Giglio mhuwiex iżolat, hekk kif fl-aħħar żmien ukoll kien irraportat attakk ieħor mill-istess establishment ikkordinat minn Chris Said fil-konfront tal-kandidat Għawdxi Alex Borg.
Hu mifhum kif quddiem dan kollu, il-Kap Nazzjonalista Bernard Grech ma jista’ jagħmel xejn għaliex huwa l-istess establishment li poġġieh hemm.
Dan anki għaliex kull mossa minn Bernard Grech, tkun segwita minn tfakkira mill-istess nies.
