Old Town road, il-kanzunetta favorita ta’ Nicholas Zammit, iċ-ċkejken ta’ seba’ snin li tilef ħajtu traġikament l-għada tal-Milied wara li kien involut f’inċident b’gaffa f’barriera fis-Siġġiewi.
One News tkellem ma’ ħuh Braiden f’għeluq it-tnax-il sena tiegħu. Qalilna li x-xewqa tiegħu kienet li jdoqq din il-kanzunetta fuq ir-radju u jsemmagħha lis-semmiegħa tad-dj popolari Ryan Spiteri biex ifakkar il-memorja ta’ ħuh.
Huwa qalilna li jħoss ħafna n-nuqqas ta’ ħuh u għadu jiftakar fil-mumenti sbieħ li kienu jilagħbu flimkien.
“Gawdejthom billi nilgħabu fuq il-playstation, niġġieldu, niġġieldu nilletikaw.”
Ommu Joelene qaltilna li din il-kanzunetta kienet għal qalb ħafna binha.
“Kienet favorita tiegħu għaliex kien kif jismagħa kien joqgħod jaqbeż u jiżfen u jagħmel il-mossi bħalma jagħmlu, kien idoqqa spiss id-dar.”
Id-DJ popolari Ryan Spiteri, qalilna li mill-ewwel aċċetta t-talba ta’ Braiden biex idoqq din id-diska waqt il-programm popolari tiegħu fuq One Radio.
“Programm naqa differenti għax minbarra d-diski 90s, daqqejt id-diska old Town Road li kien iħobb nicholas, u minħabba Braiden biex naraħ kuntent lest li nagħmel kollox.”
B’qalbu maqsuma Braiden ftakar ukoll f’mumenti sbieħ meta kienu jilagħbu flimkien.
“Kien jilgħab ħafna toys tal-gafef, u ta’ trakkijiet hekk, affarjiet hekk.”
Ommu Jolene qaltilna li binha kellu xewqa kbira li jaraha tingħaqad fis-sagrament taż-żwieġ ma’ missieru.
“Ijwa f’Lulju li ġej jien u missieru se ningħaqdu flimkien fis-sagrament taż-żwieġ, għallih kienet xi ħaġa speċjali għaliex kien jgħidli li issa daqt tiġi Zammit bħalna.”
Waqt li stqarret li binha kien tifel eżemplari u jaf iħobb, Joelene qaltilna li wliedha kienu qishom ħobża u sikkkina, dejjem flimkien għax ma kinux jgħaddu mingħajr xulxin tant li fi kliem Braiden innifsu kienu qishom kalamita.
