Fil-31 ta’ Lulju 2017, id-Dipartiment tad-Dwana ser jintroduċi n-National Import System (NIS) għar-rilaxx tal-merkanzija.
Żgur li ma kienx jagħmel sens u, fil-fatt, kien ikun sogru kieku d-Dipartiment kompla jsostni s-sistema qadima kurrenti anke minħabba l-ispejjeż u l-kumplikazzjonijiet involuti fil-manteniment tas-sistema. Kien għalhekk li d-Dwana rrejalizzat l-urġenza tal-bżonn għal bidla f’sistema ġdida bbażata fuq l-aħħar teknoloġija fis-suq.
L-Agenzija tal-Gvern, MITA, ġiet fdata bl-iżvilupp tal-NIS il-ġdida u, biex ikun żgurat li l-proġett ikun kompatibbli mar-regolamenti doganali tal-Unjoni Ewropeja saru diversi laqgħat mal-uffiċjali tad-Dwana. Kien għalhekk li, fi ħdan is-Sezzjoni tal-IT tad-Dwana, twaqqaf tim ta’ implimentazzjoni biex jaħdem id f’id mal-esperti tal-MITA u jipprovdilhom is-sosten neċessarju pass pass mal-iżvilupp tas-sistema.
Minbarra l-introduzzjoni tal-NIS, id-Dipartiment tad-Dwana hu mpenjat li jdaħħal sistemi oħra fil-qasam tat-teknoloġija tal-informatika li għandhom ikunu jahdmu sal-2020, skont il-ħtiġijiet stabbiliti mill-Unjoni Ewropeja. Fost dawn is-sistema ġodda nsibu l-faċilita’ tas-Single Window, il-Proof of Union Status (Electronic T2L), ir-rilaxx ċentralizzat, id-deċiżjonijiet doganali li joħorġu mill-Union Customs Code (UCC), ir-Registered Exporter System(REX) u t-titjib fil-Binding Tariff Information (BTI). L-introduzzjoni ta’ dawn is-sistemi ġodda timxi fuq il-linji tal-Programm Doganali 2020, li ġie xprunat mill-Kummissjoni Ewropeja biex ikunu aġġornati l-proċessi tad-Dwana u jidhol ambjent mingħajr l-użu tal-karta fid-Dwana.
Għan ieħor tal-Programm hu li l-iStati Membri jużaw sistemi elektroniċi kompatibli ma’ xulxin, tiddaħħal analizi ta’ riskju b’mod elektroniku mal-Unjoni Ewropjea kollha u jitjieb il-bdil ta’ informazzjoni bejn aġenziji ta’ kontroll fuq il-fruntieri. Permezz ta’ dan it-titjib, id-dikjarazzjoni b’mod elektroniku issir ir-regola u, eventwalment, jidħol ir-rilaxx doganali centralizzat. Ir-riżultat aħħari għandu żgur ikun għall-benefiċċju tal-kompetittivita’ tal-kumpaniji li jmexxu n-negozju fl-Ewropa billi jitnaqqsu sostanzjalment l-ispejjeż biex wiegħed jaderixxi mar-regolamenti u titjib is-sigurta’ kummerċjali fost l-iStati Membri.
Fejn għandha x’taqsam il-komunita’ kummerċjali, it-tim inkarigat mill-implimentazzjoni tal-proġett, flimkien mal-Sezzjoni tar-Riċerka u Żvilupp, fi ħdan id-Dipartiment tad-Dwana, qed jieħdu ħsieb it-taħriġ lill-operaturi ekonomiċi, lill-aġenti tar-rilaxx u lill-uffiċjali tad-Dwana. Fil-fatt, diġa’ għaddejjin sezzjonijiet ta’ taħriġ prattiku u ddisinjat apposta ma’ dawk kollha involuti.
Minbarra minhekk, dan l-aħħar, id-Dipartiment tad-Dwana varja l-ewwel verżjoni tal-Customs Mobile App li, permezz tagħha, ikunu magħrufa l-avviżi tad-Dipartiment u informazzjoni utili oħra. Issa, imiss l-App li permezz tagħha jitħaffef l-użu tal-Customs Declaration System billi, min juża din is-sistema, ikun mgħarraf f’liema stadju waslet d-dikjarazzjoni tiegħu. Fil-fatt, in ġenerali, id-Dipartiment għandu waħda mill-prijoritajiet ewlenija tiegħu li jifrex kemm jista’ s-servizzi tiegħu online biex, b’hekk, jitħaffu l-proċeduri doganali.
