Aktar espressjoni artistika u pieni aktar ħorox għall-pornografija estrema.
Dawn huma fost l-punti ewlenin tar-riforma fil-liġi taċ-ċensura li għall-ewwel darba tintroduċi wkoll ir-revenge porn bħala att kriminali.
Filfatt pajjiżna huwa wieħed mill-ewwel stati Ewropej li daħħal din il-liġi bħala att kriminali. Pajjiżna issa huwa wieħed mill-ewwel pajjizi Ewropej li għamel att kriminali t-tixrid ta’ pornografija bi tpatija.
Waqt li l-pornografija estrema li tinkludi l-involviment ta’ tfal u persuni b’diżabilità kienet diġà att kriminali permezz ta’ din ir-riforma dan ġie meqjus bħala reat kriminali serju b’pieni aktar ħorox.
Mill-banda l-oħra, il-wiri ta’ pornografija, u l-użu ta’ xeni pornografiċi f’kuntest artistiku, huma regolarizzati b’liġijiet li jħarsu l-interessi tal-minuri u l-moralità pubblika. B’hekk waqt li l-artisti huma liberi jesprimu ruħhom kif mixtieq, kwalunkwe wirja ta’ dan it-tip trid tkun magħluqa esklussivament għall-adulti, bi twissijiet ċari għal kulħadd.
Ir-riforma telimina ukoll il-vilifikazzjoni tar-reliġjon minn att kriminali.
Dan ifisser li jekk pereżempju wieħed jilbes kostum ta’ qassis fil-karnival, ma jkun qed jikser l-ebda l-liġi. Xi ħaġa li rajna ftit tas-snin ilu fil-karnival ta’ Għawdex.
Madankollu jibqa’ reat kriminali li tqanqal l-mibgħeda jew tinstiga l-vjolenza fuq bażi ta’ reliġjon, orjentazzjoni sesswali, razza.
Adrian Buckle, Direttur Artistiku stqarr ma’ one.com.mt li dan kien pass kuraġġuż li se jgħin lill-artisti Maltin jesprimu lilhom infushom bla biża’.
“Id-dritt tal-espressjoni mhuwiex biss biex ngħid affarijiet li n-nies komdi bihom. Imma wkoll biex ngħid affarijiet li jistgħu jixxokjaw u joffendu lill-komunità. Dak li tfisser demokrazija.”
Buckle sostna li r-reliġjon hi ħaġa li għandha tiġi kkritikata u jekk hemm bżonn anke mżebilħa. Sostna li hemm bżonn liġi li tipproteġi dan id-dritt.
Id-Direttur Artistiku qal li l-Qorti mhix ta’ min joqgħod fuqha. “Fil-każ ta’ STITCHING, żewġ qrati kkonfermaw ċensura ta’ reċta li tittella’ mad-dinja kollha.”
Fi kliemu, apparti r-reliġjon hemm bżonn li nżebilħu persuni bħall-President, u l-Prim ministru u l-Kap tal-Oppożizjoni. “Hemm bżonn aktar liġijiet favur id-dritt tal-espressjoni u demokrazija. Imma dan kien pass kbir ’il quddiem.
“Liġijiet moderni favur il-vulnerabli u aktar libertà artistika lill-artisti”
B’referenza għar-riforma fil-liġi taċ-ċensura, il-Ministru għall-Ġustizzja u l-Kultura Owen Bonnici stqarr li dawn huma liġijiet moderni favur il-vulnerabli u aktar l-liberta artistika lill-artisti.
Il-Ministru Bonnici nnota kif hemm pieni aktar ħorox għall-pornografija estrema għall-ewwel darba tintroduċi wkoll ir-revenge porn bħala att kriminali. Filfatt pajjiżna huwa wieħed mill-ewwel stati Ewropej li daħħal din il-liġi bħala att kriminali.
Irrimarka li pajjiżna issa huwa wieħed mill-ewwel pajjiżi Ewropej li għamel att kriminali dwar it-tixrid ta’ pornografija bi tpatija.
Waqt li l-pornografija estrema li tinkludi l-involviment ta’ tfal u persuni b’diżabilità kienet diġà att kriminali permezz ta’ din ir-riforma dan ġie meqjus bħala reat kriminali serju b’pieni aktar ħorox.
Il-Ministru Owen Bonnici innota li permezz tar-riforma mhux se jkun permezz lingwaġġ ta’ mibgħeda jew lingwaġġ kontra kull tip ta’ reliġjon.
Artisti li attendew għall-konferenza tal-aħbarijiet tkellmu dwar l-importanza u l-bżonn ta’ dawn il-liġijiet għall-qasam artistiku.
Min-naħa tiegħu, iċ-Ċermen għall-Kunsill Malti għall-Arti, Albert Marshall qal dan huwa mument importanti fl-iżvilupp dejjem jikber favur il-libertà tal-kelma lill-artist.
“Fil-programm tagħna biex ninternazzjonalizzaw il-prodott tagħhom u lilhom infushom, aktar ma nimmodernizzaw il-pożizzjoni politika Maltija u kulturali, inkunu fl-istess livell ma’ artisti barranin f’dawk li huma drittijiet.”
Madanakollu l-Arċisqof Charles J. Scicluna talab lill-Alla jaħfer, wieħed jassumi lil min għadda l-liġi, għax fi kliemu ‘ma jafux x’qed jagħmlu’.
