Matul l-iskeda tas-sajf, ONE se jerġa’ jxandar l-episodji tas-sensiela Emilja, li oriġinarjament kienet ixxandret għall-ewwel darba tnax-il sena ilu. L-episodji ser ikunu qed jixxandru mit-Tnejn sal-Ġimgħa fl-4pm b’episodju kuljum.
L-iskeda tas-sajf tibda t-Tnejn 4 ta’ Lulju iżda għall-ewwel 3 ġimgħat tal-iskeda tas-sajf, l-episodji ta’ Emilja ser jixxandru mit-Tlieta sal-Ħamis.
L-istorja ta’ din is-sensiela ddura ma’ Emilja li tgħix f’familja materjalment fqira ma’ ommha Livia, missierha John u ż-żewġ ħutha Andrei u Glenn. Fil-ħajja, bħalma jingħad, il-kelb il-magħkus kultant idur għalih id-dubbien u hekk jiġrilha din il-familja minħabba ċirkustanzi li ħadd ma jkollu kontroll fuqhom. Il-mixja ta’ din il-familja timxi biswit dik tal-familja Sanson li hi familja sinjura, immexxija minn Margaret Sanson, imdawra bis-sefturi Grace, it-tifla tagħha Sophie u l-ġardinar George.
L-intriċċi tal-ħajja, hekk kif jiġri fil-ħajja reali, ħolqot sitwazzjonijiet ta’ mħabba, emozzjoni, tradiment , ferħ u niket. L-istorja se turina kif u għaliex il-karattri jaġixxu b’dak il-mod u tikber l-ispekulazzjoni ta’ kif se jiżvolġu u jispiċċaw l-affarijiet.
Fil-parti prinċiparli nsibu lil Lara Azzopardi, Yvonne Pace, Evelyn Saliba La Rosa, Mariella Chetcuti Delmar, Simone Zammit, David Rizzo, Chris Caruana, Donnah Busuttil, Anton Debono, Adrian Caruana u Rebecca Parnis.
