John Grima huwa l-artist li ntgħażel biex jagħmel il-mafkar tal-ġgant tal-letteratura Maltija, il-Professur Oliver Friggieri.
Dan wara s-sejħa li ħarġet ftit xhur ilu għad-disinn tal-mafkar. Ġie deċiż ukoll li l-monument jitqiegħed il-Furjana, fejn il-Professur Friggieri qatta’ tfulitu u żgħożitu.
F’Diċembru li għadda, Heritage Malta, taħt l-awspiċi tal-Uffiċċju tal-Prim Ministru, kienet ħarġet sejħa għal proposti għad-disinn ta’ mafkar f’ġieħ il-Professur Friggieri.
Il-proċess biex jinħadem dan il-mafkar kien ikkordinat mis-Sur Mario Cutajar, id-Direttur Eżekuttiv ta’ Heritage Malta u s-Segretarju Permanenti Ewlieni fl-Uffiċċju tal-Prim Ministru.
Fi stqarrija Heritage Malta qalet li qed ikun propost li l-mafkar tal-Professur Friggieri jitqiegħed qrib il-monument li jfakkar l-Ewwel Gwerra Dinjija, faċċata tal-monument f’ġieħ Dun Karm Psaila, il-poeta nazzjonali.
In-nefqa indikata għad-disinn u l-bini tal-mafkar hija ta’ madwar €100,000.
