Id-Deputat Nazzjonalista Carm Mifsud Bonnici, magħruf li m’għandux affiljazzjonijiet ma’ xi waħda mill-fazzjonijiet fil-Partit tiegħu, attakka l-azzjonijiet estremisti, li rajna fil-Parlament fl-aħħar jiem, immexxija mill-kap de facto Karol Aquilina.
F’opinjoni fl-aħħar ħarġa ta’ Il-Mument, parti mill-midja uffiċjali tal-Partit Nazzjonalista stess, Dr Mifsud Bonnici jesprimi fehma sinċiera, iżda b’saħħitha, kontra l-fazzjoni tal-establishment li llum qed taħkem lill-Oppożizzjoni u qed tmexxi lil Bernard Grech minn imnieħru.
Taħt it-titlu ‘Fit-triq l-irġulija’, l-eks Ministru jirreaġixxi għall-azzjonijiet u l-konfronti dispreġġjattivi fl-ogħla istituzzjoni nazzjonali, fejn il-kollegi tiegħu lanqas biss ippermettew lill-Prim Ministru Robert Abela jagħmel stqarrija ministerjali dwar is-serqa tad-droga mill-barracks tas-suldati f’Ħal Safi ġimgħa ilu.
Fil-kitba tiegħu, hu qabbel dak li ġie ppreżentat lill-poplu, li jippretendi diskussjonijiet maturi, bħala ċirklu jew il-preliminari għall-Karnival ta’ din is-sena.
Bl-għajjat, theżżiż ta’ snin u anke insulti, inkluż lejn l-Ispeaker Anġlu Farrugia, l-estremisti mmexxija minn Karol Aquilina ppretendew li l-Parlament jiddibatti b’mod miftuħ is-serq ta’ aktar minn mitejn kilogramma ta’ kannabis, bir-riskju serju li jiġu preġudikati l-investigazzjonijiet tal-Korp tal-Pulizija u l-proċeduri ġudizzjarji kontra dawk involuti.
Waqt li kkritika lil dawk li jridu biss il-politika tal-konfrontazzjoni, Dr Mifsud Bonnici jissokta jgħid li “meta xi ħadd ma jkunx irid jiddiskuti dak li għaliha jara bħala politikament skomdu, ħafna drabi jaħseb li l-konfrontazzjoni bla sens se tgħinu joħroġ mill-isqaq li jkun daħal fih. Imma l-verità hija kompletament il-kontra.”
Din il-kritika minn Mifsud Bonnici hi koerenti mad-dikjarazzjoni li għamel ftit ilu dwar il-ħdura mill-fergħa estrema fl-Oppożizzjoni fejn tenna li, b’tali attitudni, il-Partit Nazzjonalista la qatt jista’ jirkupra u wisq inqas jattira nies ġodda lejh.
“Ġieli tidħol għand in-nies u jgħidulek, imma inti m’intix aħdar, għalfejn qed titkellmu b’din il-ħdura? Għaliex qed titkellmu b’mod illi intom tattakkaw lin-nies personali? Għamlu l-argument u daqshekk. Allura l-Partit Nazzjonalista kien qed jiġi perċepit diġà hemm barra bħala forza mhux tar-raġuni, imma forza reazzjonarja. Meta tasal hemm, huwa totalment żbaljat.”
Carm Mifsud Bonnici – Deputat tal-Partit Nazzjonalista
F’Il-Mument, id-Deputat Nazzjonalista kompla li l-kalma, il-moderazzjoni u l-għarfien tas-servizz għan-nies huma elementi essenzjali.
Mill-esperjenza politika twila tiegħu, jgħid li “jekk irridu nżidu fl-appoġġ popolari, din hija t-triq li dejjem rajtha tirbaħ. Meta wieħed jersaq u jaġixxi lejn iċ-ċentru, u miċ-ċentru, ikun fil-post proprju fejn il-maġġoranza tridek tkun. Ma tirbaħx elezzjoni, għax jivvotawlek biss tal-partit tiegħek.”
