Il-Perit li mexxa l-bord li fl-2012 għamel l-istima tal-art tal-Löwenbräu wara li Żaren Vassallo kien imwiegħed kompromess, huwa l-Perit li ddisinja u fassal id-Dar Ċentrali tal-Partit Nazzjonalista. Kuntrattur ewlieni fil-bini tal-istess Dar Ċentrali kien Żaren Vassallo, li minbarra li ta donazzjonijiet kbar lill-Partit Nazzjonalista, il-partit għadu midjun miegħu sal-lum.
Dan il-Perit huwa l-Professur Alex Torpiano li fl-aħħar jiem ikummenta mal-gazzetti biex jiddefendi l-istimi li għamel hu u l-kumitat tiegħu fl-2011. Biex wara li għamel dan il-Partit Nazzjonalista dlonk ħareġ jipprova jirkeb fuq din id-dikjarazzjoni.
Iżda, il-fatti u d-dokumentazzjoni li għandna f’idejna turi kemm hawn ukoll qed iqumu mistoqsijiet dwar il-ġudizzju ta’ Azzopardi, li kien jaf li fost l-affarijiet li għandhom komuni Vassallo u Torpiano hemm li t-tnejn li huma ħadmu fuq l-istamperija. Minkejja dan, Jason Azzopardi, kien komdu bl-għażla tiegħu fil-bord ta’ evalwazzjoni.
L-għażla tal-Professur Torpiano bħala Ċermen tal-kumitat kienet maqbula bejn iż-żewġ naħat, wara li Żaren Vassallo kien imwiegħed kompromess mill-Ministru. Fil-fatt, fix-xhieda tiegħu fil-Qorti, Żaren Vassallo kien qal hekk: “Kont mort għand il-Ministru responsabbli dak iż-żmien u r-risposta kienet dan, però, lesti li npoġġu madwar medja u nsibu kompromess… Imbagħad kien hemm suġġeriment li nagħmlu arbitraġġ u jien qbilt mal-idea u ftehemna fuq chairman ta’ dan l-arbitraġġ li kien il-Professur Torpiano u ż-żewġ naħat kellhom jinnominaw perit kull wieħed.”
Vassallo ma jafx biss lill-Professur Torpiano għax ħadmu t-tnejn flimkien fuq id-Dar Ċentrali. Iżda, l-kumpanija tal-Professur Torpiano hija wkoll involuta fl-iżvilupp tal-MIDI fejn Żaren Vassallo huwa wkoll direttur. Dan fost għadd ta’ proġetti oħra anke pubbliċi li l-kumpaniji tat-tnejn li huma ntgħażlu biex jaħdmu fuqhom.
Torpiano u ż-żewġ periti l-oħra, wieħed magħżul minn Vassallo u ieħor mid-Dipartiment tal-Artijiet, iddeterminaw il-valur tal-art f’Tal-Istabala, Ħal Qormi, dak ta’ €706,400. L-uffiċċju tal-Awditur Ġenerali jqis din il-valutazzjoni bħala waħda li ma tirrappreżentax il-valur tal-art.
L-art fl-2012, mingħajr il-kundizzjonijiet kienet stmata tmien miljun ewro.
“It-taqbil ta’ dawn il-valuri ma’ dawk li tħallas il-gvern jirriżultaw f’kobor li ma jistax ikun spjegat b’mod raġunat u jestendu l-limitu aċċettabbli u ġust,” jgħid l-Awditur Ġenerali fir-rapport tiegħu. Hawn ukoll l-Awditur Ġenerali jgħid li l-Ministru għandu element ta’ responsabbiltà għax kien jaf x’qed jintalab. L-Awditur Ġenerali ma setax jifhem min iddeċieda li l-kumitat kellu jevalwa l-art bil-prezzijiet tal-1990. “L-NAO huwa tal-opinjoni li dan jirrappreżenta nuqqas kbir ta’ governanza tajba,” ikompli jgħid ir-rapport tal-Awditur Ġenerali. Jgħid ukoll li l-Ministru jġorr responsabbiltà għal din il-miżinterpretazzjoni kbira tal-valur tal-art.
Iżda, Jason Azzopardi sa issa ma wieġeb xejn għal dawn il-mistoqsijiet u wisq anqas refa’ r-responsabbiltà politika. Saħansitra iktar mhu qed iqumu mistoqsijiet, Azzopardi iktar qed jevitahom. Wara li fl-aħħar jiem sar magħruf li tal-Marsovin ħarrkuh bħala xhud f’kawża għax jaf il-każ u li tal-Marsovin kienu ħarrku lilu qabel l-2009 Azzopardi baqa’ jevita l-ġurnalisti tant li wasal biex irrapporta lill-pulizija lill-ġurnalista ta’ ONE li marret titlob spjegazzjonijiet wara l-bieb tal-uffiċċju tal-kostitwenza tiegħu.
Iktar dubji dwar l-għażliet ta’ Jason Azzopardi
Kien Joe Saliba li għażel lil TBA Periti tal-Professur Alex Torpiano biex jiddisinjaw id-Dar Ċentrali. Saliba, biċċa waħda ma’ Żaren Vassallo tant li mhux darba u tnejn mar fuq il-jott tiegħu u llum jaħdem għalih, kien l-applikant għall-bini tad-Dar Ċentrali u filwaqt li fuq l-applikazzjoni tidher TBA Periti, il-Professur Torpiano mbagħad għamel il-kuntatti kollha ma’ dik li dak iż-żmien kienet l-Awtorità Maltija għall-Ambjent u l-Ippjanar. Il-kumpanija ta’ Torpiano ħadet ukoll għadd kbir ta’ direct orders fi żmien Gvern Nazzjonalista u fost l-iktar kuntratti ewlenin. Kien hemm okkażjonijiet ta’ xogħol pubbliku wkoll fejn il-kumpanija ta’ Torpiano ħadet il-perizja u Vassallo xogħol ta’ kuntrattur.
It-taqbil ta’ dawn il-valuri ma’ dawk li tħallas il-Gvern jirriżultaw f’kobor li ma jistax ikun spjegat b’mod raġunat u jestendu l-limitu aċċettabbli u ġust.
