L-għada li ħarġu dettalji dwar talbiet deskritti bħala “esaġerati” li qed jagħmlu l-bdoti tal-Air Malta fil-mument fejn il-kumpanija qed tfittex sieħeb strateġiku, kitbet iċ-chairperson tal-kumpanija.
Maria Micallef, persuna ta’ esperjenza kbira fil-qasam tan-negozju u kummerċjali, fissret kemm hu diffiċli tikkritika sezzjoni tal-ħaddiema pubblikament. Peró żiedet: “Iżda, meta parti żgħira tal-ħaddiema – ironikament l-aħjar imħallsa u l-iktar stmati – thedded pubblikament li twaqqaf l-operat tal-kumpanija jkun wasal il-mument li titkellem.”
F’artiklu fit-Times of Malta qalet li kienet qed tagħmel dan b’dispjaċir iżda bit-tama li tirbaħ ir-raġuni.
“L-indikazzjonijiet juru li n-negozjati mal-Alitalia jinsabu fid-direzzjoni t-tajba. Se nanalizzaw il-business plan fil-jiem li ġejjin,” qalet Micallef li esprimiet it-tama li dan se jkun kruċjali għal Air Malta li tibda tagħmel il-qligħ.
“Iżda, l-assoċjazzjoni tal-bdoti qed tpoġġi dan f’periklu milli thedded bi strike fl-aqwa tal-istaġun dan sempliċiment għax għadna qed niddiskutu ftehim kollettiv,” qalet Micallef li fissret kif qed isir minn kollox biex jintlaħaq kompromess.
“Peró l-attitudni tal-Assoċjazzjoni tal-Piloti tibqa’ waħda mhix raġunata u li taqdi lilhom biss,” żiedet Micallef li stqarret kif ħaddiema oħra tkellmu magħha b’diżappunt.
Fakkret li azzjoni industrijali bħal din tiswa lill-Air Malta ma’ nofs miljun ewro kuljum. Għalhekk ġimgħa ġġib fix-xejn snin ta’ ħidma.
“Xi jfisser dan? Mhux ħafna għal uħud mill-bdoti li jistgħu jsibu impjieg x’imkien ieħor. Iżda, x’jiġri mill-kumplament? X’jiġri mill-mijiet l-oħra ta’ ħaddiema tal-Air Malta?” kompliet Micallef.
Qalet li t-tmexxija tal-kumpanija qed tagħmel minn kollox biex lil dawn tiggarantilhom ġejjieni u għalhekk f’dan il-mument ħadd m’għandu jhedded is-sitwazzjoni.
Kitbet dwar l-irwol tal-Air Malta u żiedet tistqarr li l-piloti jridu iktar f’mument fejn wieħed ma jistenna ebda għajnuna mill-Unjoni Ewropea u t-taħdidiet qegħdin f’perjodu sensittiv. Appellat biex bħalissa kulħadd jingħaqad, anke għaliex kulħadd irid jifhem li hemm deċiżjonijiet diffiċli x’jittieħdu.
“Għandi t-tama li dan jista’ jiġri. Għandi t-tama li l-piloti se jaraw ir-raġuni u jiġu lura mal-mejda tan-negozjati b’sens aħjar ta’ koperazzjoni u teamwork. Dak li għandna flimkien huwa żgħir wisq biex ninfirdu,” qalet Micallef li ta’ xi ħadd b’esperjenza kbira fin-negozju tgħaraf tajjeb ferm tpoġġi kollox f’perspettiva.
• X’QED JITOLBU L-PILOTI? It-talba għaż-żieda fis-salarju li qed issir mill-Assoċjazzjoni tal-Piloti, l-ALPA, tfisser li l-ispiża tal-Air Malta fuq is-salarji tal-piloti titla’ b’sitt miljun ewro fis-sena. B’hekk f’mument fejn il-piloti għaddejin b’numru ta’ azzjonijiet industrijali qed jitolbu żieda ta’ €50,000 kull wieħed fil-paga li jieħdu d-dar. Għalkemm l-ALPA ċaħdet li qed titlob dan kollu u qalet li se titkellem wara li tiddiskuti mal-Air Malta.
