Iċ-Ċentru għall-Anzjanità Attiva ta’ Ħal Qormi ġie inawgurat uffiċjalment wara li għadda minn proċess estensiv ta’ tisbiħ u rinnovazzjoni.
L-investiment għal dan il-proġett ammonta għal madwar €42,000, fejn il-parti l-kbira tax-xogħlijiet saru mill-ħaddiema tas-sezzjoni tal-Home Handyman fi ħdan l-Anzjanità Attiva u l-Kura fil-Komunità.

Dan iċ-ċentru jilqa’ fih aktar minn 90 membru attiv u joffri programm varjat ta’ attivitajiet, bħal eżerċizzju fiżiku, line dancing, crafts u ħarġiet kulturali. Iċ-ċentru jiftaħ mit-Tnejn sal-Ġimgħa bejn is-7:00 ta’ filgħodu u t-3:15 ta’ waranofsinhar.
L-Anzjanità Attiva u Kura fil-Komunità attwalment għandha 35 ċentru attiv, b’parteċipazzjoni ta’ madwar 2,500 anzjan fil-ġimgħa.
Bl-inawgurazzjoni taċ-ċentru f’Ħal Qormi, din l-entità governattiva issa se tkompli tikkommetti ruħha li toffri ambjent sigur, komdu u inklussiv għall-anzjani f’kull rokna ta’ Malta u Għawdex.
F’diskors f’din l-okkażjoni, is-Segretarju Parlamentari għas-Saħħa u l-Anzjanità Attiva, Malcolm Paul Agius Galea, qal li, filwaqt li qed ikomplu jiżdiedu ċ-ċentri tal-anzjanità attiva fil-pajjiż, l-impenn jibqa’ wkoll li dawk eżistenti jibqgħu f’livell għoli, b’ambjent modern u servizz ta’ kwalità għolja.

“Sodisfazzjon kbir għalina kollha, għax aħna qegħdin naraw l-anzjani tagħna kuntenti, f’post ġdid, fil-verità f’dan il-post sar rinnovar b’saħħtu ħafna, anke mill-ħaddiema tal-Anzjanita Attiva u l-Kura fil-Komunità qed naraw ukoll li għandna suffetti ġodda, madum ġdid, kċina ġdida, mbajjad, post sabiħ mmens, aħna hekk irridu naraw lill-anzjani tagħna fil-komunitajiet tagħna b’saħħithom u kuntenti.”
Dr Renzo DeGabriele, Kap Eżekuttiv tal-Anzjanità Attiva u Kura fil-Komunità, irringrazzja lill-ħaddiema għax-xogħlijiet ta’ rinnovar f’dan iċ-ċentru.
“Bħalissa għaddejjin diversi xogħlijiet, jiġifieri dan iċ-ċentru hu wieħed mix-xogħlijiet għaddejjin, hemm proċess ukoll fejn kull ċentru tal-anzjanità attiva qegħdin nirrinovawh u naqilgħuh minn ta’ taħt fuq u nbiddlu kollox f’dawn iċ-ċentri. Hemm ukoll il-proġetti fejn qed nagħmlu refurbishments fid-djar tal-anzjani tal-Imtarfa, kif ukoll dik tal-Mosta, kif ukoll lejn l-aħħar ta’ din is-sena bidu tas-sena dieħla hemm ippjanat ukoll li niftħu ċentru tad-dimensja f’Tas-Sliema”.