L-aħħar tellieqa kompetittiva tal-istaġun 2024 tar-Royal Malta Yacht Club, il-Medcomms Round Malta, kienet deskritta bħala tellieqa eċċitanti. Din it-tellieqa, li ssir kull sena fil-Jum tar-Repubblika, offriet taħlita ta’ kundizzjonijiet fosthom riħ u mbatt qawwi li offrew azzjoni mimlija adrenalina għall-parteċipanti kollha.
Minħabba li l-flotta kienet mdaqqsa, ir-Race Officer Martin Azzopardi, qasam il-kompetituri f’żewġ gruppi. L-ewwel grupp kien jinkludi jottijiet tal-Klassi IRC Racers, filwaqt li t-tieni grupp kien jinkludi IRC Cruisers u jottijiet tal-RMYC.
It-tellieqa segwiet korsa li bdiet b’direzzjoni lejn in-nofsinhar ta’Malta. Iż-żewġ klassijiet kellhom intervall ta’ ħames minuti bejn kull bidu. Matul it-tellieqal-flotta ltaqgħet ma’ mewġ kbir u riħ qawwi mil-lbiċ, li ħoloq kundizzjonijiet eċċitanti, partikolarment mal-kosta tal-punent, fejn xi dgħajjes laħqu veloċitajiet ta’ 24 mil-nawtiku fis-siegħa.
Bidu tajjeb mill-jott Miame Too ta’ Ralph Landwehr rata l-ewwel li daret mal-Fairway Buoy, Madankollu, l-Elusive 2, tal-aħwa Aaron, Christoph, u Maya Podesta, malajr naqqset id-distakk u reġgħet ħadet il-vantaġġ meta qabżet lil Miame Too ħdejn Bengħajsa. Hekk kif kompliet it-tellieqa, Miame Too ġiet maqbuża minn Jubatus ta’ Sean Borg u Calypso ta’ Seb Ripard.
“Kienet tellieqa eċċitanti f’kundizzjonijiet sbieħ b’tim tassew tajjeb. Kuntenti ħafna bir-riżultat mhux biss ta’ din it-tellieqa imma ta’ l-istaġun kollu,” qal Carlo Landwehr ta’ Miame Too.
L-ewwel jott li spiċċat it-tellieqa kienet Elusive 2, segwita minn Jubatus u Calypso.
Wara l-korrezzjoni tal-ħin, Calypso ħarġet rebbieħa overall f’tellieqa li l-ekwipaġġ ta’ Calypso ddeskrivew b’mod xieraq bħala tellieqa “imxarrba u imqallba”.
“Ħadna gost immens mal-kosta tal-punent, ntellqu f’mewġ kbir, li spiċċajna kollha mxarrbin sew u fejn laħqna veloċitàjiet ta’ 24 mil-nawtiku fis-siegħa. Kienet rollercoaster tajba! Din kienet tellieqa oħra super kompetittiva, iżda li ħadna ħafna gost,” ikkummenta s-skipper ta’ Calypso, Sebastian Ripard.
Klassi tal-Cruising
Mario Debono, skipper ta’ Janissah u Rear Commodore tar-Royal Malta Yacht Club, wera li d-determinazzjoni u r-reżiljenza jagħtu l-frott, billi kiseb ir-rebħa fil-Klassi IRC Cruiser.
“Il-kundizzjonijiet tat-temp kienu tassew kif mistenni, b’mewġ kbir u riħ ġieli jilħaq sa 30 mil nawtiku fis-siegħa. Kienet tellieqa tassew eċċitanti, u kburi ħafna bil-ekwipaġġ ta’ Janissah li laqa l-isfida,” qal Debono.
Fil-Klassi RMYC Cruising, Windigo ta’ Philip Apap Bologna kienet l-ewwel jott li spiċċat it-tellieq kif ukoll rebħet il-Klassi overall. Din kienet waħda mill-akbar flottot RMYC Cruisers għal din it-tip ta’ tellieqa.
“Il-Medcomms Round Malta kienet konklużjoni perfetta għall-istaġun tat-tlielaq tal-RMYC. Issa qed nħarsu ‘l quddiem biex nippreparaw għall-kalendarju tat-tlielaq tal-2025, li jipprometti sena oħra eċċitanti ta’ tlielaq diversi u ta’ sfida għall-ekwipaġġi tagħna,” qal Adrian Gauci Borda, Rear Commodore (Sailing) tal-RMYC.
Riżultati tal-Medcomms Round Malta
Overall & IRC Klassi 1 – Calypso (Sebastian Ripard)
IRC Klassi 2 – Juniper (Brian Flahive)
IRC Cruisers – Janissah (Mario Debono)
RMYC Cruisers – Windigo (Philip Apap Bologna)
Ir-RMYC esprima l-gratitudni tiegħu lil Medcomms għall-appoġġ kontinwu tagħha kif ukoll lir-Race Management Team, immexxi minn Martin Azzopardi.
Filwaqt li l-programm tat-tlielaq kompetittivi issa jinsab uffiċjalment magħluq, ir-RMYC se jorganizza tellieqa ta’ divertiment fil-Boxing Day – is-26 ta’ Diċembru – b’dħul kollu mogħti lill-kampanja L-Istrina tal-Malta Community Chest Fund Foundation.
(Photo Credit: RMYC / Deea Buzdugan)
