Matthew Paris, ġuvni kuraġġuż. Ilu għal dawn l-aħħar għaxar snin jgħix b’kundizzjoni serja ta’ saħħa mentali: dik magħrufa aħjar bħala psikożi.
Il-psikożi hija marda li biha tħossok konfuż dwar dak li hu reali u dak li mhuwiex. Xi ħadd li jbati mill-psikożi jista’ jisma’, jara, ixomm, jew itiegħem xi ħaġa li fil-fatt ma tkunx qiegħda hemm.
ONE News iltaqa’ ma’ Matthew waqt konferenza tal-aħbarijiet mill- Caritas Malta. Matul dawn l-aħħar tliet snin il-Caritas kompliet taħdem qatigħ biex persuni mhux biss bi problema tad-droga iżda wkoll bi sfidi ta’ saħħa mentali jkollhom għajnuna biex jerġgħu jqumu fuq saqajhom.
Il-Caritas tat rendikont fuq servizz ta’ rijabilitazzjoni bl-isem ta’ HelpEx, li issa Matthew wkoll jagħmel parti minnu.
Qal, “Jiena nbati mill-psikożi. Ili nesperjenza sintomi ta’ psikożi dawn l-aħħar għaxar snin. Fil-bidu qisu ppruvajt inkampa ftit waħdi. Imbagħad fittixt l-għajnuna u mort ħafna għall-aħjar, u mort l-università, studjajt il-psikoloġija, u issa qed naħdem mar-Richmond Foundation. ”
Dan is-servizz tal-HelpEx, bi sħubija ma’ sitt pajjiżi oħra fl-Unjoni Ewropea, huwa mmirat għal taħriġ anki biex nies li ngħataw dan is-servizz fil-passat issa jsiru assistenti u jgħinu aktar nies li għandhom bżonn l-għajnuna.
Issa li Matthew jagħmel parti minn dan it-tim ta’ ħaddiema fil-Fondazzjoni Richmond, qal li l-eperjenza tiegħu ta’ kif donnok tidħol f’dinja oħra meta ġġarrab din il-kundizzjoni, tgħinu biex jifhem aktar lin-nies li jċemplu jew imorru għandhom għall-għajnuna.
Qal, “iln naħdem tliet snin mar-Richmond Foundation. Ħdimt f’diversi servizzi. Ovvjament, ikolli ħafna client contact, li huma stess ibatu minn problemi ta’ saħħa mentali. Naħseb li l-esperjenza tiegħi tgħinni għax anki speċifikament ma’ nies li jesperjenzaw psikożi, jiena nista’ nifhem sa ċertu punt affarijiet bħal hallucinations u affarijiet hekk li jesperjenzaw forsi ftit iktar minn ħaddieħor. Il-klijenti jaraw lili, jafu li jiena għaddejt minn xi ħaġa simili, jgħinhom ukoll li jaraw naqra ta’ hope u suċċess li jistgħu jilħqu.”
Matthew Paris għadda messaġġ ta’ kuraġġ lil dawk kollha li forsi huma mbeżżgħin biex jagħmlu l-pass biex ifittxu l-għajnuna u qalilhom li m’humiex waħedhom. Bi ftit sforz min-naħa tagħhom, hemm ħafna nies li jistgħu jgħinuhom.
Qal, “Iva, servizzi għandna, għajnuna hemm. Jiġifieri jekk xi ħadd għandu bżonn jitkellem ma’ xi ħadd, jista’ jkun xi ħaġa li mhi xejn imma tista’ tkun xi ħaġa kbira ta’ barra minn hawn, aħna qegħdin hemm biex ngħinu lil kulħadd. Però, nemmen li kulħadd għandu dak ġo fih li jista’ jirnexxi u jagħmel li jrid; it just takes some time and some effort.”
