Il-Ħadd waranofsinhar fil-korsa tal-Marsa sar programm ta’ tiġrijiet bl-aktar tiġrija mportanti tkun il-Condition Race għall-Klassi Premier. Din intrebħet miż-żiemel pjuttost ġdid I won’t Dance misjuq minn Clint Vassallo. Wara t-tiġrija ic-Chairman tal-Malta Racing Club Edwin Borg ippreżenta tifkira ta’ l-okkażjoni lis-sid Dunstan Bugeja.
Charles Camilleri irnexxielu jirbaħ tliet tiġrijiet – Uveo de Maza fi Klassi Gold ħa it-tielet rebħa tas-sena, fi Klassi Silver id-debba Trytocatchme ħadet it-tieni rebħa tagħha f’dan l-istaġun u Concerto Cehere ħa r-raba’ rebħa tiegħu fi klassi Bronze.
Rodney Gatt żied żewġ rebħiet oħra meta fi klassi Silver iż-żiemel Carat Darby ħa l-ħames rebħa tiegħu u fi klassi Bronze Cesar du Bouillon irnexxielu jirbaħ għad-disa’ darba din is-sena.
Un Amour du Pont ukoll irnexxielu jieħu l-ħames rebħa tiegħu f’dan l-istaġun meta misjuq minn Andrew Farrugia rebaħ tiġrija tal-klassi Gold. Fi Klassi Silver Veulnes ħareġ rebbieħ għall-ewwel darba misjuq minn Noel Baldacchino filwaqt li għal Sillon du Breuil fi Klassi Bronze irnexxielu jirbaħ l-ewwel tiġrija f’dan l-istaġun. Il-programm fetaħ b’tiġrija tal-klassi Copper li intrebħet mid-debba Cherie de Noyelles misjuqa minn Cliferty Calleja u għaliha din kienet it-tielet rebħa tas-sena.
Il-programm li jmiss ikun nhar il-Ħadd wara nofsinhar bl-aktar tiġrija mportanti tkun il-finali tat-Tazza Johnnie Walker għall-klassi Gold.
Ritatt: Alex Azzopardi
