Fi stqarrija d-dwana qalet li sabet ħamsa u għoxrin każ fejn ħwienet kienu qed ibigħu prodotti tal-kuntrabandu jew oġġetti projbitti.
Ġie spjegat li f’dawn l-aħħar erba’ ġimgħat, it-Taqsima tal-Infurzar tad-Dwana għamlet diversi spezzjonijiet fi ħwienet madwar Malta, bl-iskop li tissalvagwardja l-interessi fiskali tal-pajjiż.
Intqal kif inqabdu u ġew ikkonfiskati fost oħrajn, ftit aktar minn sittax-il elf sigarett, ħames mija u tletin flixkun tax-xorb alkoħoliku, sebgħa u erbgħin flixkun tal-inbid u ħames kilogrammi tabakk tax-xixa.
L-ispezzjonijiet saru fil-Mellieħa, ix-Xemxija, San Pawl il-Baħar, Buġibba, il-Qawra u Paceville fost oħrajn.
