Għall-ħabta tal-17.15 ġie rrapurtat ħruq f’garaxx taħt residenza fi Triq Sant’ Andrija viċin l-iskola primarja f’Ħal Luqa li fih ikun hemm presepji u wirjiet simili minn żmien għall-ieħor. Maġenbu jinsab maħżen tal-‘airconditioners’.
Jidher li kien hemm raġel li ġie salvat mill-ewwel kif ukoll mara u kelb maqbuda ġewwa. Salvati wkoll xi għasafar. Il-mara hija anzjana iżda l-età tagħha għadha mhix magħrufa. Saret operazzjoni biex tiġi salvata l-mara kif ukoll il-kelb. Il-mara żammet komunikazzjoni permezz tal-mobile mat-tifel tagħha sakemm ġiet salvata.
Intant il-pulizija flimkien ma’ membri tal-Protezzjoni Ċivili daħlu fil-garaxx minn residenza oħra li tinsab maġenb dan il-garaxx billi sgassawlha l-bieb. Tabib fuq il-post ta l-ewwel għajnuna lil din il-mara.
Għadd ta’ pulizija kif ukoll membri tal-protezzjoni ċivili jinsabu fuq il-post biex tiġi kkontrollata s-sitwazzjoni. Ammont ta’ ambulanzi minn Mater Dei jinsabu wkoll fuq il-post fejn diġa’ ttieħdu xi nies l-isptar uħud minnhom isofru minn xokk qawwi.
Waqt li kienet għaddejja l-operazzjoni ta’ salvataġġ seħħet splużjoni li nqabdet ‘live’ mill-ġurnalist ta’ ONE News waqt li kien qed fuq il-post.
Jidher li f’mument minnhom inqala’ anke diżgwid għal xi raġuni, bejn xi persuni li kienu fuq il-post.
Għadd ta’ nies inġabru fil-viċinanzi. Hemm numru ta’ pulizija fuq il-post li qed jassistu din l-operazzjoni u jassiguraw l-aħjar sigurtà għar-residenti. Preżenti wkoll hemm il-Kummissarju tal-Pulizija Lawrence Cutajar u l-Kap tal-Protezzjoni Ċivili Emmanuel Psaila.
Jidher li l-operazzjoni biex jintefa’ n-nar u tikkalma s-sitwazzjoni mistennija li tieħu l-ħin sa anke tard matul il-lejl li ġej.
Il-Pulizija qed tappella għal kalma ħalli jsir ix-xogħol kif meħtieġ.
Aktar dettalji minn ħin għall-ieħor.
Segwi DIRETT fuq: https://www.facebook.com/ONE.com.mt/videos/281007819219046/
