Fil-baġit għas-sena d-dieħla l-Gvern tabilħaqq huwa impenjat li jgħin fil-qasam tal-housing soċjali u biex il-housing ikun affordabbli.
Bis-suq tal-kera kull ma jmur qed ikun ta’ sfida, dan il-qasam huwa relatat mal-housing soċjali.
Huwa għalhekk li l-Gvern se jkun qed joħroġ White Paper li mistennija tesplora deċiżjonijiet importanti fosthom li l-kuntratti tal-kirjiet jirregolaw b’kemm tista’ togħla l-kera u għal kuntrarju tas-snin passati, il-Gvern mhux se jħalli s-suq tal-kera jsuq.
F’dan il-baġit il-Gvern ħabbar ukoll li se jwessa’ t-thresholds għas-sussidju tal-kera biex hekk aktar kerrejja jibbenefikaw mill-għajnuna li jagħti l-Gvern.
Ma’ dawn it-thresholds se jkun hemm oħrajn speċjali għall-anzjani minn ħamsa u sittin sena ‘l fuq.
Bil-għan li jindirizza aktar bis-serjeta’ l-isfida li jinsab fih bħalissa l-qasam tal-housing soċjali, il-Gvern se jkun qed iniedi skema t’assistenza finanzjarja sa massimu ta’ ħamsa u għoxrin elf ewro għal kull residenza privata fuq xogħolijiet ta’ manutenzjoni bil-kundizzjoni li s-sidien jintrabtu li jikru l-proprjeta’ tagħhom lill-Awtorita’ tad-Djar fuq perjodu t’għaxar snin.
Din il-miżura tmur id f’id mal-iskema nikru biex nassistu li se tibqa’ miftuħa u b’hekk se jiżdiedu l-proprjetajiet disponnibli għal housing soċjali.
Konxju mill-fatt li ċertu binjiet tad-djar li għandha f’idejha l-Awtorita’ m’humiex aċċessibbli kompletament, permezz ta’ fondi Ewropej u pubbliċi se jkun hemm investiment ta’ sittax-il miljun ewro għall-installazzjonijiet ta’ liftijiet f’aktar minn mitt binja.
Dan l-investiment mistenni jolqot aktar minn elfejn resident fosthom sitt mija u sittin anzjan u ftit aktar minn mitt persuna b’diżabilita’.
Inċentiv ieħor ġeneruż partikularment għall-anzjani huwa għal dawk li issa qed jgħixu f’dar tal-anzjani u għandhom post tal-Gvern f’idejhom.
Kemm il-darba dawn l-anzjani jiddeċiedu li jagħtu l-post lura lill-Gvern se jonqos il-ħlas mill-pensjoni b’għoxrin fil-mija b’riżultat li l-anzjani se jieħdu lura f’buthom sa massimu ta’ elfejn u seba’ mitt ewro fis-sena.
Sabiex ikollna housing aktar affordabbli, il-Gvern se jestendi s-self soċjali.
Wara li din l-iskema diġa għenet mitt ruħ bi ftehim mal-bank tal-APS, issa se jkun hemm ftehim mal-Bank of Valletta biex tlett mitt persuna oħra jintlaqtu b’mod pożittiv minn din l-iskema.
Għal sena oħra il-Gvern se jestendi l-miżura tal-first time buyers biex b’hekk dawk li jridu jixtru proprjeta’ għall-ewwel darba ma jħallsu l-ebda taxxa tal-boll fuq l-ewwel mija u ħamsin elf ewro.
Iżda f’dan il-baġit il-Gvern se jagħti wkoll tnaqqis fit-taxxa tal-boll għal dawk li jixtru t-tieni proprjeta’ tagħhom.
Hawnhekk it-tnaqqis tat-taxxa tal-boll jista’ jilħaq it-tlett t’elef ewro.
Ma’ dawn l-inċentivi kollha se tiġi estiża t-tnaqqis fir-rata tat-taxxa tal-boll minn ħamsa fil-mija għal tnejn fil-mija għal dawk interessati li jixtru proprjeta’ f’Għawdex.
