Qormi Daikin jinsabu biss punt bogħod miċ-champions GREE Sliema Hotsticks meta f’konfront delikat għelbu lil Floriana Young Stars 2-1.
Kienet logħba b’Qormi li kellhom ħafna mill-pussess iżda bi Floriana li bdew jitilgħu b’kontrattakki perikolużi bid-difiża avversarja li kienet dejjem attenta.
Wara li fl-ewwel żewġ quarters ma ġie skorjat l-ebda gowl, Qormi ħadu tajjeb fit-tielet wieħed u marru minn fuq permezz ta’ Luke Bajada.
Fir-raba’ quarter, Floriana bdew jittantaw aktar xortihom iżda f’mument minnhom inqabdu fuq sieq waħda tant li l-Qriema għamluhom tnejn u kien l-istess Luke Bajada li għeleb lill-goalkeeper avversarju.
Floriana skorjaw il-gowl tal-bandiera lejn l-aħħar tal-partita permezz ta’ Mark Camilleri iżda kien tard wisq sabiex isalvaw il-logħba.
Umpires: Emile Borg u Glen Bonello.
KLASSIFIKA – KAMPJONAT NAZZJONALI TAL-HOCKEY
GREE Sliema Hotsticks 10, Qormi Daikin 9, Floriana Young Stars 7, White Hart 0
Mill-Hockey 9s, Rabat Depiro għelbu lil Marsaskala Summer Nights bl-iskor ta’ 2-1.
Kien James Azzopardi li poġġa lir-Rabtin minn fuq sabiex Kieran Borg ġab l-iskor indaqs għal Marsaskala.
Rabat skorjaw il-gowl tar-rebħa fl-aħħar quarter meta kien Jason Vella li għeleb lill-goalkeeper ta’ Marsaskala.
Umpire: Karl Chircop.
Sadanittant, Qormi Daikin rebħu l-kampjonat ta’ taħt it-18-il sena għal dan l-istaġun.
Il-Qriema mmexxija mill-kowċ Zack Degiovanni rnexxielhom jirbħu l-logħbiet kollha sabiex kellhom rekord perfett tul din il-kompetizzjoni.
Fl-aħħar logħba tagħhom, huma għelbu lil GREE Sliema Hotsticks 8-5 f’konfront ferm interessanti.
Minkejja li Qormi marru minn fuq, is-Slimiżi għarfu jdawru l-iskor favurihom għalkemm fl-aħħar mill-aħħar kienu ċ-champions il-ġodda li ħadu l-punti massimi.
Giorgio Muscat kompla jispikka meta skorja erba’ gowls b’Wyatt Magri awtur ta’ tripletta. Jake Montebello għaqqad l-iskor finali għal Qormi.
Sliema baqgħu fil-logħba b’doppjetta ta’ Gary Bonnici u gowls oħrajn ta’ Rick Micallef u Jayden Cutajar.
Umpires: Edward Hughes, Glen Bonello.
F’logħba oħra mill-istess kampjonat, Marsaskala Summer Nights għelbu lil Qormi Ladies 2-1.
Alessandro Piscopo u Kieron Borg skorjaw għall-Iskalin bin-nisa Qriema li naqqsu l-marġni tal-iskor minn Kym Bianco.
Umpires: Emile Borg, Karl Chircop.
