Il-proġett ta’ ħidmet il-pulizija qalb il-komunità se jkun estiż f’għaxar lokalitajiet ġodda. Dan wara li l-proġett inbeda matul is-sena li għaddiet fil-Mellieħa.
Ħabbar dan il-Ministru għall-Intern u s-Sigurtà Nazzjonali Byron Camilleri.
Il-pulizija fil-komunità tintegra iżjed man-nies tal-lokal u tagħti iżjed serħan il-moħħ.
Il-lokalitajiet fejn fil-ġimgħat li ġejjin il-Pulizija se jżidu l-preżenza fil-komunità huma r-Rabat, Ħad-Dingli, l-Imdina, is-Swieqi, Pembroke, Marsaxlokk, Birżebbuġa, il-Fgura, il-Floriana u l-Belt Valletta.
Ma’ ONE News il-Ministru Camilleri semma li dan qed isir biex il-Pulizija jkunu eqreb taċ-ċittadin u bħala parti minn strateġija sabiex tipprevjeni l-kriminalità.
Huwa stqarr: “Il-ħsieb wara l-community policing li l-Korp tal-Pulizija, l-uffiċjali tal-Pulizija jkunu aktar qrib iċ-ċittadin, aktar qrib il-kunsill lokali, aktar qrib il-komunità kummerċjali sabiex b’hekk nilħqu l-politika ta’ prevenzjoni u anke naraw li tiżdied is-sigurtà u dak kollu li wieħed jistenna mill-korp tal-Pulizija f’dik il-lokalità partikolari.”
Elenka wkoll għas-suċċess ta’ dan il-proġett fil-Mellieħa, fejn qal li din wasslet biex żdiedet il-fiduċja fil-membri tal-korp mir-residenti ta’ dan il-lokal pittoresk.
Il-Ministru Camilleri sostna: “Il-proġett tal-Community Policing beda bħala proġett pilota fil-Mellieħa. Hemmhekk rajna li kien suċċess għaliex mhux biss il-politika ta’ prevenzjoni ta’ kriminalità ħadmet bil-fatti iżda wkoll it-trust rating, il-fiduċja tar-residenti anka żdiedet fil-Korp tal-Pulizija.”
Il-Ministru tenna l-impenn tal-Gvern li jkompli jagħti r-riżorsi kollha possibbli sabiex tkompli tonqos il-kriminalità. Fil-fatt l-aħħar statistika maħruġa l-ġimgħa li għaddiet turi kif din naqset b’10% fuq medda ta’ tliet snin.
