Fi stqarrija l-Ministeru għall-edukazzjoni u x-xogħol qal li l-ewwel impenn tal-Gvern hu li jassigura titjib fil-kundizzjonijiet tax-xogħol tal-għalliema. Dan ġie rifless ukoll fid-diskors tal-baġit ibbażat fuq il-manifest elettorali tal-Gvern.
Il-Gvern u l-union tal-għalliema qegħdin jaħdmu fuq pjan biex dawn il-kundizzjonijiet jitjiebu permezz ta’ negozjati għal ftehim settorali ġdid.
Però dan huwa biss pass wieħed biex titjieb is-sitwazzjoni.
Ma’ dan, il-Gvern qed jaħdem fuq tal-anqas sitt punti prinċipali oħra:
1. Jitħares il-livell ta’ well–being u rispett lejn l-għalliema u l-iskejjel;
2. Jissaħħu l-istrutturi bi proċessi aħjar fejn għalliema, flimkien mal-amministrazzjoni, ikunu involuti direttament fit-tibdiliet fil-klassi li jixtiequ jaraw bħalma sar f’eżerċizzju bla preċedent fejn għall-ewwel darba s-sillabi li se jiġu introdotti jintbagħtu lill-għalliema (f’każijiet anke jinbidlu mill-ġdid);
3. Inkomplu nsaħħu l-livell ta’ kwalità ta’ taħriġ u preparazzjoni tal-għalliema fil-kuntest tad-domanda preżenti ta’ għalliema u bit-tisħiħ ta’ regolatur indipendenti;
4. Jiddaħħlu forom differenti ta’ inċentivi biex aktar żgħażagħ jagħżlu li jidħlu f’dan is-settur;
5. Att tal-Edukazzjoni ġdid;
6. Is-supply teachers jingħataw opportunitajiet ta’ taħriġ meħtieġa biex isiru għalliema regolari, filwaqt li jiżdiedu l-għalliema fil-klassijiet li jkunu gradwati b’taħriġ ta’ kwalità fl-edukazzjoni li jirrispetta l-professjoni.
Is-sitwazzjoni preżenti
L-isfida ta’ nuqqas ta’ għalliema hija sfida li qed tiġi indirizzata b’mod wiesa’ hekk kif id-domanda fl-iskejjel tkompli tiżdied.
Hemm numru ta’ raġunijiet li wasslu għal sitwazzjonijiet li hemm bżonn jiġu indirizzati b’mod effettiv, fosthom:
1. Id-domanda ta’ nuqqas ta’ ħaddiema f’dan is-settur ma tagħmilx is-settur edukattiv l-unika eċezzjoni f’dan il-pajjiż. F’diversi setturi ekonomiċi qed naraw ħtieġa qawwija ta’ ħaddiema f’kull livell, mill-kostruzzjoni sal-inġinerija. Napprezzaw li filwaqt li setturi oħra jistgħu faċilment jimpjegaw ħaddiema barranin f’nuqqas ta’ dawk Maltin, fl-edukazzjoni jeżiżtu barrieri li jridu jinqabżu biex dan isir, primarjament ta’ lingwa.
2. L-iskejjel tal-istat qed jaraw domanda dejjem tkompli tiżdied ta’ studenti li jixtiequ jidħlu minħabba li l-popolazzjoni tal-pajjiż qedatikber b’rata b’saħħitha. Dan qed jiġi rifless anke bl-ammont ta’ proġetti ta’ tkabbir fl-iskejjel u skejjel ġodda li qed jinbew, biex ikun hemm iżjed spazju.
3. Mill-2013, il-programmi edukattivi ma baqgħux one–size–fits–all, u allura kellek sitwazzjoni fejn studenti qed jingħataw esperjenza edukattiva iktar iffukata b’għalliema dedikati. Dan, filwaqt li kien hemm tibdil kruċjali u importanti, fisser ukoll bżonn ta’ iżjed edukaturi.
