Kollox kien qed jindika li Hibernians seta’ jkollhom rebħa faċli, hekk kif sa tmiem l-ewwel taqsima, kienu, żewg goals minn fuq. Madankolu, fit-tieni taqsima Santa Lucia wettqu reazzjoni tajba u fejn barra li skorjaw żewġ goals li permezz tagħhom ġabu d-draw momentarju, għamlu l-ħajja ferm diffiċli għall-Pawlisti. Iżda, finalment kienu Hibernians, li ħarġu rebbieħa bl-iskor ta’ 3-2.
Hibernians għamlu l-intenzjonijiet tagħhom ċari mal-ftuħ tal-partita u fetħu l-iskor fil-ħames minuta meta kien Giannis Bastianos li venven xutt b’saħħtu li ma ta l-ebda ċans lill-goalkeeper ta’ Santa Lucia, Francisco Celio.
Il-Luċjani wettqu reazzjoni tajba u mal-kwarta logħob, xutt ta’ Carlos Gabriel għadda ftit għoli.
Iżda 20 sekonda biss wara, il-Pawlisti rduppjaw l-iskor meta minn ġirja tajba ta’ Rodney Antwi, dan mix-xellug għadda tajjeb lejn Giannis Bastianos li b’xutt mill-ewwel tefa’ ġewwa, biex b’hekk irreġistra doppjetta persoanli għat-team tiegħu.
Kulma jmur kompla d-dominju assolut tat-team minn Raħal Ġdid u fid-19-il minuta Hibernians rebħu penalty meta Patrick de Oliveira waqqa’ lil Luiz Enrique Guedes fil-kaxxa.
Iżda Mill-11-il metru, inkariga ruħu Rodney Antwi li ra t-tenattiv tuegħu salvat bi bravura minn Celio.
Santa Lucia resqu ferm viċin li jnaqqsu l-marġni tal-iskor fit-32 minuta meta Tatsuro Nagamatsu temm ġirja tajba permezz ta’ konklużjoni fil-baxx, bil-ballun jintemm ftit barra.
Fil-ftuħ tat-tieni taqsima, Santa Lucia dehru ttrasformati u fit-52 minuta naqqsu l-marġni tal-iskor meta Tatsuro Nagamatsu kellu xutt fil-baxx li ġie salvat bi ftit mill-goalkeeper tal-Pawlsiti, Ibrahim Kone, biex mir-rebound, Lucas Sena Silva, tefa’ ġewwa.
FilIl-Luċjani komplew jipproduċu logħob sabiħ u erba’ minuti wara, ġabu l-iskor indaqs permezz ta’ Adam Bradshaw li venven xutt li ma ta l-ebda ċans ll Kone.
Iżda kellhom ikunu Hibernians li jiskorjaw il-goal tar-rebħa fit-72 minuta meta Rodney Antwi temm ġirja taba fuq il-lemin, għadda tajjeb lejn Jurgen Degabrielle, li mill-viċin iddepożita l-ballun fix-xibka.
Santa Lucia wettqu reazzjoni tajba u fit-83 minuta, xutt ta’ Mattias Ellul, għadda ftit għoli.
Hibernians komplew jamministraw il-vantaġġ minimu li kellhom sa tmiem il-partita.
Referee: Glen Tonna
BOV Plejer tal-Logħba: Giannis Bastianos (Hibernians FC)
