Hibernians irritornaw għar-rebħ meta għelbu lil Gudja United bl-iskor minimu ta’ 1-0. Kienet rebħa kollox ma’ kollox meritata għall-Pawlisti, fejn iżda wieħed ma jrid ineħħi xejn mill-mertu tal-Gudjani li offrew oppożizzjoni denja tul id-90 minuta.
Madankollu, detrimentali għalihom kienet it-tkeċċija tal-captain Karl Micallef fil-75 minuta, hekk kif imbagħad kienu fqar mill-ideat u naqsu milli jimpostaw il-logħob tagħhom.
Kienet ukoll rebħa importanti għall-moral ta’ Hibernians, wara bidu ta’ staġun ferm diżappuntanti għalihom. Huma kellhom lill-captain Bjorn Kristensen, Zachary Grech u Ferdinando Apap sospiżi.
Hibernians ħolqu l-ewwel periklu fit-13-il minuta meta xutt minn barra l-kaxxa ta’ Giannis Bastianos ġie salvat mingħajr wisq diffikultá mill-goalkeeper ta’ Gudja, Yaren Sozer.
Il-partita kompliet ikkaratterizzata minn ħafna logħob f’nofs il-ground, fejn kien biss fit-42 minuta li ġiet innutata azzjoni oħra denja ta’ nota, bil-Pawlisti jkunu huma li joħolqu l-periklu meta Giannis Bastianos kellu xutt mill-viċin li ħabat max-xibka minn barra, biex ta l-illużjoni tal-goal.
Huma komplew fuq l-offensiva u minuta biss wara Claudio Bonanni ttanta xortih peremzz ta’ xutt mid-distanza li iżda għadda ftit għoli.
Il-pressjoni kienet kollha fuq il-Pawlisti u fil-ftuħ tat-tieni taqsima ħarġu ferm aggressivi fit-tentattiv li jiftħu l-iskor u rnexxielhom jagħmlu dan fis-47 minuta meta Giannis Bastianos avvanza tajjeb, ġie wiċċ imb’wiċċ ma’ Yaren Sozer, u b’opportuniżmu liema bħalu tefa’ ġewwa, b’dan ikun ir-raba’ goal staġjonali tiegħu. U biex l-affarijiet ikomplu ġejjin ħażin għal Gudja, fl-74 minuta huma spiċċaw jilagħbu b’10 players meta tkeċċa għalihom Karl Micallef wara li rċieva ammonizzjoni doppja fi spazju ta’ ftit sekondi … it-tnejn minħabba rimarki li għadda fil-konfront tar-referee, Ishmael Barbara.
Fid-90 minuta, freekick tal-ispeċjalista Matias Muchardi għal Gudja għadda ftit għoli, b’din tkun l-unika azzjoni denja ta’ nota li huma ħolqu tul il-partita.
Inkoraġġiti mill-fatt li bdew jilagħbu bi player iktar, Hibernians, komplew jamministraw il-vantaġġ minimu li kellhom sa tmiem il-partita.
Referee: Ishmael Barbara
BOV Plejer tal-Logħba: Giannis Bastianos (Hibernians)
