Fl-ewwel partita tal-Ħadd fic-Centenary Stadium iltaqgħu Santa Lucia u Hibernians b’dawn tal-aħħar jirbħu 2 – 0 biż-żewġ goals jaslu fl-ewwel taqsima.
Bidu kwiet tant li l-ewwel azzjoni perikoluża waslet wara kwarta logħob meta kien Alessio Piazza ta’ Santa Lucia li kellu xutt li kien parzjalment salvat minn Hugo Sacco, u mir-rebound kien Aleksa Mrdja li minn taħt l-lasta kkonkluda barra.
Hibernians wieġbu fl-25 minuta minuta meta wara azzjoni ta’ corner l-ballun spiċċa għand Kurt Shaw li naqas milli jolqot l-ballun, bl-istess ballun spiċċa barra u l-azzjoni sfumat fit-xejn.
Minuta biss wara u Hibernians fethu l-iskor meta wara nuqqas ta’ ftehim fid-difiża ta’ Santa Lucia, kien Alex Bruno De Souza Silva li approfita u avvanza, iżda kien l-captain Jurgen Pisani li fit-tentattiv li jikklerja l-ballun xeħet fix-xibka tiegħu stess.
Mat-tokki tal-45 minuta Hibernians kabbru l-marġini ta’ l-iskor meta wara azzjoni ta’ corner, kien hemm taħwida fil-kaxxa, bil-ballun spiċċa għand Lucas Carauna, li b’xutt b’saħħtu minn tarf l-kaxxa tefa’ l-ballun fis-saqaf tax-xibka.
Eżatt qabel tmiem l-ewwel taqsima mill-ġdid Hibernians permezz ta’ Jurgen Degabriele li wara li rċieva ballun tajjeb kellu x-xutt li għadda ferm għoli.
Żewġ minuti mil-ftuħ tat-tieni taqsima u Hibernians resqu viċin li jkomplu jkabbru l-iskor meta Sime Zuzul irċieva ballun tajjeb iżda x-xutt angolat tiegħu minn ġol-kaxxa għadda barra.
Fit-52 minuta wieġbu Santa Lucia meta kien Evardo Pinto Gomes li provda l-kross u s-sostitut Lucas Sena Silva ra’ d-daqqa ta’ ras tiegħu tagħdi għoli. Sekondi wara Santa Lucia mill-ġdid permezz ta’ Santiago Moracci li rebaħ ballun u prova jikkonkludi minn tarf il-kaxxa iżda Sacco salva tajjeb.
Komplew fuq l-offensicve Santa Lucia u fil-55 minuta, Lucas Silva bir-ras minn azzjoni ta’ corner spiċċat barra.
Santa Lucia komplew ikunu protagonisti meta Lucas Silva irċieva ballun tajjeb iżda x-xutt bid-dawra minn barra l-kaxxa tiegħu għadda barra.
Minuta wara wieġbu Hibernians meta kien s-sostitut Rodney Akowuh li għadda ballun il-quddiem fil-kaxxa lill- Jurgen Degabriele, b’dan ta’ l-aħħar prova xutt li kien mdawwar tajjeb f’corner mill-goalkeeper ta’ Santa Lucia.
Ħdax il-minuta mit-tmiem u mill-ġdid kienu Santa Lucia li pprovaw meta Alessio Piazza kellu xutt b’saħħtu li kien mdawwar f’corner minn Hugo Sacco.
Mat-tokki ta’ 90 minuta kien Alessio Piazza għal Santa Lucia li wara li avvanza x-xutt minn barra l-kaxxa kien salvat u mdawwar f’corner mill-goalkeeper Hugo Sacco.
Referee: Slobodan Petrovic
BOV Plejer tal-Logħba: Lucas Caruana (Hibernians FC)
