Permezz ta’ wirja ferm konvinċenti, Hibernians għelbu l-isfida ta’ Hamrun Spartans bl-iskor ta’ 2-0, biż-żewġ goals għalihom jaslu permezz tal-eroj tagħhom Jurgen Degabriele li rreġistra doppjetta personali, b’goal f’kull taqsima.
M’hemmx dubju li din kienet rebħa ferm meritata għall-Pawlisti li ddettaw il-partita tul id-90 minuta b’Hamrun ikunu biss dell tat-tim li għeleb lil Naxxar Lions bl-iskor kbir ta’ 6-0 fi tmiem il-ġimgħa li għaddiet, fejn fost oħrajn naqsu milli jwettqu xi tip ta’ pressjoni wara l-goals li sofrew filwaqt li dehru xquq fid-difiża, biż-żewġ goals li sofrew jaslu proprju minn indeċiżjoni f’dan id-dipartiment.
Kienu Hamrun li ħolqu l-ewwel periklu fis-seba’ minuta meta wara li rċieva minn corner ta’ Luke Monetbello, Roko Prsa, żmarkat ghal kollox kellu d-daqqa ta’ ras tiegħu mill-viċin tintemm ftit barra.
Hibernians wieġbu fit-12-il minuta meta xutt mid-distanza ta’ Alfred Silas għadda għoli.
L-Ispartans reġgħu ħolqu l-periklu żewġ minuti biss wara meta Chris Ondong għadda tajjeb lejn Luke Montebello li min-naħa tiegħu serva lil Ryan Camenzuli li kellu x-xutt tiegħu mill-viċin jaħbat max-xibka minn barra, biex ta l-illużjoni tal-goal.
Iżda kienu l-Pawlisti li fetħu l-iskor fis-17-il minuta meta wara li approfitta minn clearcance qasira ta’ Juan Carlos Corbalan, JURGEN DEGABRIELE, b’konklużjoni sublimi minn gol-kaxxa għar-rokna tax-xibka għeleb għal kollox lill-goalkeeper internazzjonali ta’ Hamrun, Henry Bonello.
Kien biss fil-45 minuta li waslet l-azzjoni sussegwenti, b’Hamrun ikunu huma li joħolqu l-periklu meta Luke Montebello għadda tajjeb lejn Ryan Camenzuli li kellu l-cross-shot tiegħu jiġi devjat f’corner minn difensur ta’ Hibernians.
Fil-ftuħ tat-tieni taqsima Hibernains ħarġu ferm aggressivi u fid-49 minuta rduppjaw l-iskor meta JURGEN DEGABRIELE approfitta minn nuqqas ta’ komunikazzjoni fid-difiża bejn Corbalan u Mbong, u b’eleganza qabbeż il-ballun minn fuq Bonello, f’liema azzjoni Degabriele deher li weġġa’ xi ftit u eventwalment ġie sostitwit fl-64 minuta.
Hamrun ħolqu azzjoni remota ta’ periklu fis-70 minuta meta freekick tal-ispeċjalista Roko Prsa ġie interċettat mill-goalkeeper Spanjol tal-Pawlisti, Pablo Sanchez.
Huma komplew fuq l-offensiva u fis-77 minuta, xutt fil-baxx minn ġol-kaxxa ta’ Mbong ġie salvat minn Sanchez f’żewġ tentattivi.
Hibernians komplew jamministraw il-vantaġġ doppju li kellhom sa tmiem il-partita.
Referee: Slobodan Petrovic
Plejer tal-Logħba: Jurgen Degabrielle (Hibernians FC)
