Fit-tieni partita tal-Ħadd fl-Stadium Nazzjonali Hibernians u Valletta ħadu punt kull wieħed fi draw ta’ 2-2 biex kull ma jmur qed tkompli tikkomplika ruħha s-sitwazzjoni Valletta u tagħmiet tagħhom li staġun ieħor jilagħbu fl-ogħla divizjoni tal-futbol lokali.
L-ewwel azzjoni tal-partita waslet wara tlett minuti minn Hibernians meta kien Alex Bruno De Souza Silva li wara li qabeż difensur avversarju kellu xutt li għadda ftit barra.
L-azzjoni li segwit waslet biss man-nofs siegħa logħob meta kien Rodney Antwi għal Pawlisti li wara ħarba tajba daħal fil-kaxxa u qabbeż minn fuq l-goalkeeper ta’ Valletta Alessandro Guarnone, iżda l-konklużjoni fjakka tiegħu kien salvata mill-istess goalkeeper.
Fl-34 minuta Valletta fetħu l-iskor meta kien xutt mid-distanza ta’ Brandon Paiber li ħasad għal kollox lid-difiża u lill-goalkeeper ta’ Hibernians Ibrahim Kone, bil-ballun jintemm fir-rokna tax-xibka.
Fl-40 minuta mill-ġdid reġgħu Valletta meta kien Brandon Paiber li tefa’ ballun lejn Jake Azzopardi li prova jqabbeż l-ballun minfuq l-goalkeeper ta’ Hibernians, b’Kone irnexxilu jinewtralizza l-azzjoni f’zewġ tentattivi.
Hibernians għamlu l-iskor indaqs fl-ewwel azzjoni tat-tieni taqsima meta fil-55 minuta kien Alex Bruno De Souza Silva li qassam ballun lill-Kurt Shaw, dan krossja lejn Rodney Antwi li tefa’ l-ballun fix-xibka.
Tlett minuti wara u kienu mill-ġdid Valletta meta kien xutt ta’ Keyron Ewurum b’ Ibrahim Kone salva f’żewġ tentattivi.
Mas-siegħa logħob kien Alex Bruno De Souza Silva għal Hibernians li għadda ballun lejn Rodney Akowouah Antwi, bid-difiża ta’ Valletta tbiegħed l-periklu.
Fit-63 minuta Valletta marru mill-ġdid fil-vantaġġ meta kien David Emanuel Garba li b’xutt b’saħħtu minn barra l-kaxxa għeleb lil-Kone għal 2-1.
Tnax il-minuta mit-tmiem Valletta spiċċaw b’plejer anqas meta Juan Ramirez Bolanos kien muri t-tieni karta safra fil-partita wara foul fuq plejer avversarju.
Meta Valletta dehru li qed jersqu lejn rebħa, Hibernians kisbu l-gowl ta’ draw propju fit-88 minuta meta kien Ferdinando Apap li tefa’ ballun lejn Jurgen Degabriele li b’xutt li ma jaħfirx minbarra l-kaxxa għeleb lill-goalkeeper Guarnone u għamel l-iskor 2-2.
Referee:- Slobodan Petrovic
BOV Plejer tal-Logħba: Brandon Paiber (Valletta FC)
Skor Finali : – Hibernians 2-2 Valletta
Plejer tal-logħba Brandon Paiber (Valletta)
