F’partita ferm movimentata, Hibernians u Marsaxlokk temmew il-konfront ta’ bejniethom fi draw ta’ 1-1, biex b’hekk ix-Xlukkajri ma laħqux it-tragward tagħhom li jilagħbu mat-Top Six u se jkunu qed jilagħbu mal-Bottom Six.
Kienu l-Pawlisti li ħarġu fuq l-offensiva u wara biss żewġ minuti Jurgen Degabriele għadda tajjeb lejn Gainnis Bastianos li kellu x-xutt mill-viċin tiegħu tintemm barra.
Huma komplew fuq l-offensiva u minuta biss wara Dexter Xuereb għadda tajjeb lejn Federico Falcone li kellu d-daqqa ta’ ras tiegħu mill-viċin tiġi salvata mingħajr wisq diffikultá mill-goalkeeper ta’ Marsaxlokk, Marko Drobnjak.
Kulma jmur kompla d-dominju tal-Pawlisti u fis-seba’ minuta Xuereb xeħet cross lejn Alfred Silas li tefa’ barra.
Minuta biss wara Bastianos dejjem għall-Pawlisti kellu x-xutt tiegħu mdawwar f’corner bi bravura minn Drobnjak.
Hibernians tilfu ċans tad-deheb li jiftħu l-iskor fit-12-il minuta meta Federico Falcone kellu daqqa ta’ ras tiegħu li ħabtet mal-lasta.
Seba’ minuti wara, Hibernians reġgħu kienu perikolużi meta Jurgen Degabriele għadda tajjeb lejn Falcone li min-naħa tiegħu rreċiproka lejn Degabriele li kellu x-xutt tiegħu mdawwar f’corner minn Drobnjak.
Marsaxlokk wiegbu ghall-ewwel darba fil-25 minuta meta Leandro Aguirre kellu freekick li ntemm għoli.
Żewġ minuti biss wara huma fetħu l-iskor meta minn azzjoni ta’ corner mogħti minn Aguirre, De Aguilar tefa’ ġewwa.
Fil-ftuħ tat-tieni taqsima, Hibernians ħarġu ferm aggressivi u fid-49 minuta xutt b’saħħtu ta’ Bastianos ġie salvat b’diffikultà minn Drobnjak, bil-ballun jigi ikklerjat mid-difiża ta’ Marsaxlokk.
Fil-54 minuta Jurgen Degabriele indirizza throgh pass lejn Ayrton Attard b’dan ikollu x-xutt tieghu minn pożizzjoni angulata jintemm barra.
Il-pawlsiti komplew fuq l-offensiva u tliet minuti wara Kurt Shaw kellu xutt tiegħu salvat b’diffikultà mill-goalkeeper ta’ Marsaxlokk, Drobnjak.
Marsaxlokk wieġbu fit-68 minuta meta xutt ta sostitut Holzhauser intemm barra.
Hibernians reġgħu ħolqu l-periklu fit-73 minuta meta minn cross ta Fraga, Falcone kellu d-daqqa ta’ ras tiegħu mill-viċin li ntemmet barra.
Fil-81 minuta, bl-aktar mod meritat Hibernians kisbu l-goal tad-draw meta kien proprju Federico Falcone li wara li rċieva minn cross pinġut ta’ Bruno, kellu d-daqqa ta’ ras tieghu tintemm wara Drobnjak.
Referee: Malcolm Spiteri
Plejer tal-Logħba: Federico Falcone (Hibernians FC)
