“Hi ma tgħaddix mingħajri u jien ma ngħaddix mingħajrha.”
Hekk stqarr ir-raġel ta’ mara li għal dawn l-aħħar ħames snin għandha d-dimensja.
Fix-xahar dedikat għad-dimensja, ltqajna ma’ Alfred Degiorgio li llum ħajtu jqattagħha jieħu ħsieb lil martu Mary.
Huwa spjegalna kif indunaw li martu għandha d-dimensja wara li bdiet tagħmel affarijiet li beda jħoss li ma kinux normali.
Huwa qalilna, “Il-mara bdiet tinsa xi affarijiet u bdiet anke titfixkel anke fejn l-affarijiet personali tiegħi kienet tgħaddihom lit-tifel flok ittihom lili. Allura meta bdejt nara dawn l-affarijiet u bdiet tinsa wkoll, meta bdejt nara dawn l-affarijiet mort għand it-tabib tal-familja illi rrakomandatni għand professur partikolari.”
Huwa spjega kif huwa sab ħafna għajnuna anke saħansitra minn ħabib tiegħu li jisilfu l-għalqa sabiex imur jistrieħ hemmhekk flimkien ma’ martu.
Madankollu stqarr kif ma’ kull ġurnata li tgħaddi s-sitwazzjoni ssir dejjem iżjed diffiċli minħabba t-toqol li ġġib magħha d-dimensja: “Iktar ma jgħaddi ż-żmien iktar il-ħajja titqal minħabba l-kura li trid tieħu l-mara minħabba d-dimensja. Bħalissa infatti miskina wkoll qiegħda tbati biex timxi u saqajha diġà qed iċedu xi naqra.”
Wara sitta u ħamsin sena ta’ żwieġ spjega kif għalkemm il-ħajja mhux dejjem kienet ward u żahar it-tnejn baqgħu dejjem ifittxu lil xulxin sal-lum il-ġurnata.
Qalilna kif illum qiegħed jiddedika ħajtu jieħu ħsieb lil martu, bix-xewqa li jkun jista’ jibqa’ jagħmel dan sal-aħħar nifsijiet ta’ ħajjitha:“Naħseb li kellna downs iżjed milli kellna ups biex ngħid hekk imma dejjem affaċjajniha flimkien u għadna close ta’ xulxin. Hi ma toqgħodx mingħajri, lanqas minn kamra għall-oħra ma toqgħod mingħajri u jien ma noqgħodx mingħajrha lanqas jiġifieri jekk tiċċaqlaq hi ser niċċaqlaq jien u jekk niċċaqlaq jien ser tiċċaqlaq hi.”
Huwa nnota kif ċ-ċentri ġodda ta’ respite għal persuni bid-dimensja u li ser jiftħu billejl u binhar fl-Imtarfa u iktar ‘il quddiem anke f’Ħal Safi, ser joffru soljev importanti ħafna lill-qraba li jieħdu ħsieb persuni li għandhom id-dimensja.
L-Infermiera mid-Dimentia Intervention Team, Roberta Attard Farrugia nnutat kif huwa importanti li kull min ikollu bżonn xi għajnuna relatata ma’ din il-kundizzjoni ifittex l-għajnuna minnufih.
Hija qaltilna, “Dak illi jkun irid iżjed informazzjoni fuq dimensja u servizzi, jista’ jċempel fuq in-national dimensia helpline fuq in-numru 1771. Dan huwa numru mnedi minn nurses 24 hours u jkunu jistgħu jiġu gwidati skont il-bżonn.”
