L-ugwaljanza trid tkun aċċessibbli għal kulħadd u l-Unjoni Ewropea trid tieħu rwol globali f’dan ir-rigward. Iddikjarat dan il-Kummissarju-nominat għall-Ugwaljanza Helena Dalli fil-bidu tas-smigħ tagħha quddiem il-Kumitat għad-drittijiet tan-nisa u ugwaljanza bejn is-sessi u l-Kumitat dwar l-impjiegi u l-affarijiet soċjali.
Quddiem mijiet ta’ membri parlamentari Ewropej, Dr Dalli fissret kif qatt ma’ kienet taħseb li s-settur li ddedikat il-karriera politika tagħha kienet se tkun qed tiddiskutih mad-deputati Ewropej sabiex dan jiġi avvanzat fuq livell Ewropew.
Saħqet li daħlet fil-politika ta’ 17-il sena mimlija entużjażmu u idealiżmu li tista’ ġġib bidla pożittiva fis-soċjeta. “Dak l-impenn jibqa’ jgħodd illum, u tul is-snin tgħallimt li l-bidla hija possibbli biss jekk il-politiċi jkollhom il-kuraġġ li jibdlu fuq kull livell,” qalet Dr Dalli.
Il-kummissarju nominat minn pajjiżna elenkat kif tul is-snin li serviet bħala Ministru tal-Ugwaljanza, hija iġġieldet biex jitkissru l-istereotipi
fis-soċjeta. Hija kkommettiet ruħha li jekk tkun ikkonfermata bħala Kummissarju hija, se tuża l-esperjenza tagħha biex madwar l-Ewropa jinbnew soċjetajiet iktar ugwali. Qalet li se taħdem ukoll mal-istati membri biex l-azzjoni li tittiħed tkun azzjoni fuq livell Ewropew għax l-inklużjoni u l-ugwaljanza huma temi Ewropej daqs it-tibdil fil-klima jew l-ekonomija u l-finanzi. “Din hija ġlieda li tistħoqq rispons Ewropew u li għandha bżonn l-attenzjoni sħiħa tagħna,” iddikjarat Dr Dalli.
Fid-diskors tagħha Dr Dalli saħqet li mhux se tittuba biex tuża kull mezz possibbli biex tkun promossa l-Ugwaljanza, u dawn fi tliet forom differenti:
- Il-ġlieda kontra d-diskriminazzjoni
- L-inklużjoni sħiħa tan-nisa
- Il-promozzjoni tal-ugwaljanza u l-parteċipazzjoni sħiħa fil-ħajja.
Dr Dalli ħabbret ukoll li fl-ewwel mitt jum tal-mandat tagħha, hija se tibda t-triq tat-twettiq ta’ diversi miri li l-President tal-Kummissjoni Ewropea Ursula von der Leyen kitbet fl-ittra tagħha lil Dr Dalli.
Fost dawn hemm dik li tiġi stabblita task-force Ewropea dwar l-Ugwaljanza. Din se tibni b’mod malajr mezz intersezzjonali fil-livelli kollha tal-Unjoni Ewropea.
Ma’ dan, Dr Dalli qalet li se tressaq ‘il quddiem ukoll l-istrateġija tal-ġeneru u li se tinsisti li jiġu eliminati d-diskrepanzi fil-pagi u l-pensjonijiet. Dan sakemm jasal punt li l-ġeneru ma jiddeterminax jekk wieħed hux se jitħallas inqas jew iżjed minn ħaddieħor.
Dr Dalli kkommetiet ukoll li titpoġġa fil-qafas legali il-konvenzjoni tal-Ġnus Maqgħuda dwar il-persuni b’diżabilità.
Hija temmet l-intervent tagħha billi saħqet li l-Ugwaljanza mhijiex logħba.
