Fid-diskors tiegħu l-Ħadd filgħodu f’Tas-Sliema, il-Prim Ministru Robert Abela tkellem dwar l-eżami li pajjiżna għandu bil-Moneyval. Hawn fakkar kif lura fl-2012 taħt amministrazzjoni preċedenti, il-Moneyval kienet diġà wriet x’tibdil irid isir f’pajjiżna.
Qal li dan il-Gvern ma żammx ‘il bogħod mill-bidla u indirizza n-nuqqasijiet, u li llum jinsab kunfidenti quddiem din l-isfida.
Il-Prim Ministru Robert Abela stqarr: “Ninsab kunfidenti li nistgħu ngħadduh. Kunfidenti għax ħdimna, ħdimna mhux biss b’mod kożmetiku jiġifieri ara qalulna biex nagħmlu din il-bidla u għamilna xi ħaġa superfiċjali ‘just’ kemm nolqtu l-kaxxi ta’ dak li qalulna biex nagħmlu. Le, għax verament urejna li dan il-pajjiż irid itella’ l-‘istandards’ tiegħu.”
Il-Prim Ministru nnota kif pajjiżna fehem li pajjiż modern Ewropew irid ikompli jgħolli l-‘istandards’ tiegħu. Stqarr li dawn l-istandards iridu jagħmlu l-ekonomija ta’ pajjiżna sostenibbli fit-tul għaliex pajjiżna jixraqlu li jkun magħruf għall-governanza t-tajba u s-sistemi ta’ ‘due diligence’ u trasparenza li għandu.
Dr Abela tenna: “X’għamilna? Żidna u żidna fuq li żidna r-riżorsi. Żidna biss biss premises ġodda li minnhom ser tkun qed topera l-FIAU. Żidna n-numru ta’ professjonisti li bihom hija atrezzata. Fuq kollox imma fhimna li pajjiż Ewropew modern irid itella’ l-istandards tiegħu ‘l fuq.”
Hawnhekk huwa reġa’ appella għall-għaqda quddiem l-eżami tal-‘Moneyval’ hekk kif fi kliemu l-evalwazzjoni issa se jagħmluha nies minn barra l-pajjiż u għalhekk huwa kruċjali li t-titjib li sar jasal barra minn xtutna.
Huwa sostna: “L-evalwazzjoni ser jagħmilha ħaddieħor u għalhekk huwa kruċjali li l-messaġġ li jintbagħat bħala pajjiż ikun wieħed fejn il-bidliet li għamilna fl-FIAU, fil-qasam tar-reati ekonomiċi fil-Korp tal-Pulizija, it-tisħiħ tal-Korp tal-Pulizija b’mod ġenerali, it-tisħiħ fl-MFSA, li l-messaġġ li nibgħatu bħala pajjiż, u l-pajjiż ma jfissirx biss il-Gvern imma jfisser il-pajjiż kollu inkluż l-Oppożizzjoni, ikun wieħed fejn dak li għamilna nfaħħruh.”
Il-Prim Ministru Abela spjega kif li tibqa’ tkun soġġett għall-iskrutinju tal-midja hija d-dover ta’ kull min hu fil-politika, u huwa importanti li dan il-Gvern jibqa’ jkun trasparenti mal-midja. Spjega kif huwa jemmen li l-midja trid tkun ir-raba’ pilastru tad-demokrazija tagħna.
Dr Abela saħaq: “Nemmen fil-midja bħala r-raba’ pilastru tad-demokrazija tagħna, u biex temmen fil-midja, trid tkun miftuħ magħha. Mhux tattakka l-ġurnalisti. Jien hawnhekk ser nagħmilha ċara ħafna. Ser inkun l-aqwa difensur tal-ġurnalisti kollha, ġejjin minn liema media house ġejjin. Jistgħu jkunu l-ġurnalisti tal-Partit Nazzjonalisti, mhu ser inħalli lil ħadd jattakkahom.”
Huwa temm id-diskors tiegħu billi reġa’ tenna l-wegħda li dan il-Gvern jibqa’ jkun onest mal-poplu Malti u Għawdxi, hekk kif kull wegħda li jagħmel dan il-Gvern dejjem iżommha.
Il-Prim Ministru Robert Abela temm jgħid: “Nista’ nserraħ moħħ kulħadd li ġaladarba aħna nagħtu kelma, dik il-kelma nimxu magħha. Jekk hijiex vouchers, jekk hux fuq kull deċiżjoni oħra. Il-kelma għal dan il-Gvern hija kelma. Magħna taf fejn qiegħed.”
Ara wkoll:
https://www.one.com.mt/2021/01/31/il-prim-ministru-robert-abela-bappell-qawwi-ghall-ghaqda-nazzjonali/
