Investigazzjonijiet mid-Dipartiment għar-Relazzjonijiet Industrijali u tal-Impjiegi, id-DIER, waslet biex 11-il operatur tal-food couriers tressqu l-Qorti fejn ġew immultati aktar minn €1,000 kull wieħed hekk kif ammettew li kisru r-regolamenti relatati mal-ħaddiema.
Mill-investigazzjonijiet irriżulta li l-operaturi, parti minn grupp ta’ 17 li tressqu b’kollox s’issa, kisru b’mod ċar ir-regolamenti li jirregolaw il-ħlas tal-food couriers, is-sick leave u anke s-sahra.
Numru minnhom ġew akkużati wkoll li kisru l-Att dwar l-Impjiegi u r-Relazzjonijiet Industrijali li jfisser li l-ħaddiema tilfu parti mid-dħul tagħhom, li b’kollox ammontaw għal mijiet ta’ eluf ta’ ewro, kif instema’ fil-Qorti.
Dan il-każ ikompli jżid ma’ dawk li diġa nstabu ħatja ftit ilu, fejn 39 aġenzija oħra ġew immultati minħabba li nstabu ħatja b’reati simili.
Fil-Qorti ssemma wkoll kif erba’ aġenziji ġew immultati għax ma pprovdewx id-dokumentazzjoni neċessarja waqt l-istħarriġ li wassal għall-akkużi.
L-Avukati Mattia Felice, Andrew Grima u Ray Zammit mexxew il-Prosekuzzjoni.
