Kevin Cassar, ħaten Beppe Fenech Adami, fetħilha fuq waħda mid-deputati tal-Partit Nazzjonalista f’artiklu li kiteb f’The Malta Independent.
F’paġna sħiħa fil-gazzetta, Kevin Cassar, li hu magħruf sew għal kitbiet ħorox tiegħu kontra l-esponenti tal-Gvern, ġab fix-xejn dehra ta’ Rebekah Borg fi programm fuq ir-radju tal-Knisja.
Sorsi fil-Partit Nazzjonalista qalu li, l-mod kif kiteb kontra Rebekah Borg, ħasad lill-ħafna fl-Istamperija. Dan hekk kif wieħed minn tal-qalba tal-establishment fetaħ attakk fuq waħda mid-Deputati li hi qrib il-Kap Bernard Grech.
Fuq The Malta Independent, Cassar qal lid-Deputata li qatgħet figura dipressanti u kienet totalment mhux ippreparata meta riċentament ġiet intervistata f’dan il-programm. Ikkritikaha bl-aħrax ukoll għax din l-intervista tellgħetha fuq Facebook. Fi kliem ieħor, qalilha li, tant ma tifhimx li marret ħażin, li riedet turiha lil kulħadd.
Borg, li fil-kritika tagħha fil-konfront ta’ ħaddieħor wkoll tħobb tkun personali fi stil assoċjat ma’ tal-establishment tal-PN, ħadet għaliha. Din id-darba marret twieġeb fuq il-paġna ta’ Facebook tagħha.
Lil Cassar, li għajjarha medjokri, qaltlu li l-medjokrità hi l-kitba tiegħu dwarha. Qaltlu li din hi inkompetenza sakemm mhix xi ħaġa oħra. Messaġġ sottili li, minn tagħrif li għandu dan l-istazzjon, ġie miftiehem fid-Dar Ċentrali li hu b’referenza għall-qrubija li Cassar għandu ma’ Beppe Fenech Adami.
Iżda, Cassar ma impressjonax ruħu u lil Rebekah Borg qalilha biex tikber u idealment titgħallem titkellem lingwa li tkun ċara, u preferibbilment bit-tnejn, b’referenza għall-Malti u l-Ingliż.
Sorsi fid-Dar Ċentrali qalulna kif, l-aktar ħaġa li tolqot l-għajn, hi li, sa aktar minn 24 siegħa wara, ħadd mid-Deputati sħabha fil-Partit ma appoġġjaha pubblikament. Din ġiet interpretata bħala prova li fil-PN ma teħodhiex mal-klikka tal-establishment, għax jgħarralek.
Kif wara kollox ġralu Adrian Delia, li saħansitra tneħħa minn Kap, bis-suċċessur tiegħu, Bernard Grech, dejjem qagħad attent li jogħġobhom ħalli ma jdardarx l-għajn li jrid jixrob minnha.
