Jissokta l-perjodu negattiv għac-champions Hamrun Spartans hekk kif sofrew ir-raba’ telfa konsekuttiva u qed jissugraw illi jilgħabu mall-grupp ta’ timijet fl-aħħar sitt postijiet tal-klassifika fit-tieni fażi ta’ l-ewwel round tal-kampjonat.
Minkejja li kellhom aktar mil-loghob, l-Ispartans ftit li xejn kienu effettivi matul l-ewwel taqsima tant li rari nkwetaw lill-goalkeeper Xlukkajr Drobnjak.
Fis-7 minuta tentattiv ta’ Raphael Lopes Silva għadda ftit għoli fuq il-lasta l-mimduda, waqt li fl-14-il minuta xutt imkaxkar ta’ Shaisen Attard ġie salvat faċilment minn Drobnjak.
Marsaxlokk ħolqu l-ewwel azzjoni denja fit-18-il minuta meta corner mogħti minn Leandro Aguirre ġie kklerjat bil-ponn mill-goaler Hamruniż Henry Bonello.
Ix-Xlukkajri għarfu jiddefendu tajjeb u ma qagħdux lura milli jattakkaw meta jiġihom iċ-ċans biex fit-38 minuta Jose Ulisses Arias għadda ballun tajjeb lil Yuri de Jesus Messias li minkejja li kien issikkat minn difensur daħal fil-kaxxa u għeleb lil Bonello b’xutt nofs għoli.
Fit-tieni taqsima l-Ispartans ħarġu aktar aggressivi u fit-52 minuta il-goaler Xlukkajr Drobnjak salva ferm tajjeb f’corner freekick mogħti minn Roko Prsa. Mill-azzjoni tal-corner, Emerson Marcelina ġie ffawljat mill-goaler Drobnjak biex mill-penalty li rriżulta, Joseph Mbong ma falliex għall-goal tad-draw.
Madankollu immedjata kienet ir-risposta Xlukkajra hekk kif żewġ minuti wara huma ngħataw penalty għal hands fil-kaxxa ta’ Prsa u Yuri de Jesus Messias rega’ poġġa lil Marsaxlokk fil-vantaġġ.
Hamrun ippruvaw iwettqu reazzjoni imma kienu Marsaxlokk li komplew ikabbru l-vantaġġ fit-62 minuta meta Jai Quitongo approfitta minn inċertezza fid-difiża Hamruniża biex b’xutt fil-baxx għar-rokna għeleb lil Bonello.
Hamrun tefgħu kollox fuq l-attakk fit-tentattiv li jsalvaw xi ħaġa mil-logħba u fid-79 minuta fetħu tamiet ġodda li jsalvaw ir-riżultat meta s-sostitut Gabriel Vella li kien ilu żewġ minuti biss fil-ground skorja mill-qrib minn cross tajjeb ta’ Joseph Mbong.
Fit-83 minuta Drobnjak wettaq save tajjeb minn freekick ta’ Prsa biex ċaħħdu mill-goal tad-draw bir-rebound tasal għand Gabriel Vella li mill-qrib naqas li japprofitta u xxuttja ħażin.
L-Ispartans temmew il-logħba b’10 players meta kellhom lil Matthias Ellul muri karta hamra diretta għal foul professjonali fit-93 minuta.
Referee: Trustin Farrugia Cann
Plejer tal-Logħba: Yuri de Jesus Messias (Marsaxlokk)
