Kienet partita kemmxejn medjokri u li naqset milli tilħaq l-aspettattiva dik bejn Hamrun Spartans u Gzira United, b’Hamrun iżda, mingħajr ma wisq jimpressjonaw, jagħmlu l-iktar ħaġa importanti u jiksbu t-tliet punti, biex żammew il-pass mal-leaders Floriana, għalkemm jinsabu tliet punti taħthom. Dan meta huma għelbu lil Gzira United bl-iskor ta’ 2-1, biż-żewġ goals għalihom jaslu fit-tieni taqsima.
Hamrun kienu impostati b’mod tajjeb fil-ground, kuntrarju għall-Maroons li dehru traskurati f’xi waqtiet u komplew jikkonfermaw staġun mill-aktar diżappuntanti għalihom.
Kien biss fit-18-il minuta li waslet l-ewwel azzjoni denja ta’ nota, b’Hamrun ikunu huma li joħolqu l-periklu meta freekick tal-Kroat Roko Prsa intemm ferm għoli.
Din it-taqsima kompliet ikkaraterizzata minn ħafna logħob f’nofs il-ground, fejn ma ġiet innutata l-ebda azzjoni oħra denja ta’ nota.
Il-pressjoni kienet kollha fuq l-Ispartans u fil-ftuħ tat-tieni taqsima, ħarġu ferm aggressivi u ta’ dan ġew ippremjati meta fis-47 minuta, fetħu l-iskor meta wara li rċieva minn freekick ta’ Nenov, EDERSON BRUNO DOMINGOS, kien fil-post it-tajjeb fil-mument opportun u xellef bi ftit il-ballun bir-ras li ntemm fir-rokna tax-xibka.
Gzira wieġbu fis-77 minuta permezz ta’ xutt kważi minn tarf il-kaxxa tal-captain Zachary Scerri li ġie salvat minn mal-art mill-goalkeeper Taljan, ta’ Hamrun, Federico Marchetti.
Iżda kienu Hamrun li ssiġillaw ir-rebħa permezz tat-tieni goal meta LUKE MONTEBELLO temm azzjoni personali, billi qabeż difensur avversarju u tefa’ l-ballun fir-rokna tax-xibka.
Gzira naqqsu l-marġni tal-iskor fil-ħin miżjud meta wara li rċieva minn azzjoni ta’ corner ta’ Thiago Espindola, CARLOS FILHO CONCEICAO, kellu d-daqqa ta’ ras tiegħu tintemm fir-rokna tax-xibka.
Hamrun komplew jamministraw il-vantaġġ minimu li kellhom sa tmiem il-partita.
Referee: Alex Johnson
BOV Plejer tal-Logħba: Ederson Bruno Domingos (Hamrun)
